Yo! 歡迎嚟到新一集嘅Man The Fvck Up,協助你創造一個你想要嘅戀愛生活。
好，上一集講咗如果同女仔有眼神交流時候應該點樣approach，如果你未聽呢就聽返琴日嗰一集先。
今日就講下第二個情況，就係 ＃2 佢未望到你住
呢個位就係好多男士做錯嘅位，因為如果個女士未見到你嘅時候，你突然之間喺佢面前飆出嚟，並且開始你溝女嘅攻勢，喺度吟詩作對，背誦你嘅溝女開場白，
咁個女士就會覺得，『頂，邊撚個嚟㗎，佢痴線㗎勁恐怖！』
所以呢，如果你唔想佢有咁嘅感覺，你要留意以下的重點：
＃1 永遠唔好喺佢背脊approach佢。
女仔一定要首先知道你嘅存在，你先至好開始同佢講任何嘢。
＃2 喺呢個情況，你語言上唔好太直接。
因為你未喺佢對你產生好奇之前，你咁快表示你嘅興趣係會嚇親佢嘅。
＃3 你哋嘅對話可以精簡的，最理想嘅cold approach係好似去種種子咁樣，你略略同佢傾幾句，埋下伏線之後你就離開，遲少少先至再『連根拔起』
即係話，當你第一次行去個女仔或者一班女仔嗰度嘅時候，你打破咗呢一個冰山，你之後最好就由佢哋繼續佢哋自己原本嘅conversation…
咁你之後第二次第三次再同佢哋傾計嘅時候，你就可以繼續慢慢淋水，『滋潤你棵植物』，每一次比上一次去得更深入。
＃4 盡量嘗試係頭30至60秒期間，好玩地challenge佢，激發佢對你少少吸引嘅情感。
當然你略略笑下佢,串下佢嘅時候，你嘅身體語言同時間要係有自信並且擺著一個開放式姿勢。
點解要challenge佢呢？
就係因為通常就算有男仔approach佢嘅時候，佢哋都係嗰啲馬上表達得太多傾慕嘅男士；
喺個女仔眼中，佢會覺得即使你咁大膽同陌生人傾計，你都未全面認識我個人就咁快咁冧我，咁你一定係一個黐身，麻煩，低標準嘅loser喇！
所以如果你係頭一分鐘就set少少challenge畀佢，揶揄下佢，你就會令佢好奇覺得，『啊，呢個男仔有少少唔同，究竟佢係邊個嚟㗎？』
＃5 同之前第一個情況你同佢有眼神交流接觸一樣啦，記得成個流程要慢慢嚟，要有適當嘅停頓先好開口講嘢。
＃6 唔好諗住原本三四個鐘嘅遊戲，你可以幾分鐘就能夠令佢愛上你，呢個係唔可行嘅！
你第一個approach，只需要正正常常，冷靜啲，放鬆啲，漠不關心少少，輕鬆同佢玩幾下，種下你嘅種子，埋下伏線，咁你就可以離開。
例如，你同佢講完：『Hi，我係Derek啊，你呢？』
佢答你佢叫做Stephanie，你就可以笑一笑，跟住同佢講：
『哦，Stephanie，我以前都識過一個Stephanie，佢個人性格好好㗎，希望你唔會令我失望啦 :P』
跟住佢可能喺度笑，回應返你少少嘢啦，跟住你就可以講話：
『哈哈，我講笑咋，你咁cutie，性格差都可能有人要嘅 XD』
跟住呢，你哋之間嘅能量交流就係一啲好玩嘅題材，但係你又唔好太過玩嘢喎，咁樣嘅情況下，最好大約80－90%係一啲正常少少，輕鬆嘅話題，間唔中先至好揶揄下佢，唔係嘅話呢就會太過咗火㗎喇。
當你有咁樣唔奇怪嘅first impression， 你哋下一次再撞到嘅時候，就已經係一個比較warm嘅approach，你再行下一步就會容易好多！
