Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
恭喜曬已經下載免費43頁溝女書嘅巴打們，相信你開始明白10樣女人暗地裡想你知道嘅秘密。
仲未下載嘅話，可以㩒一下片中description嗰條link，或者去manthefvckup.com/freebook 去下載呢本書。
上個禮拜問咗各位巴打對<超男之道>呢本書有冇興趣，結果係反應非常熱烈，
咁所以呢我決定嚟緊每個星期六都會對<超男之道>作出一個簡單嘅詮釋，希望裏面比較宏觀嘅concept可以幫到你。
咁因為<超男之道>都有51個chapter，所以呢個weekly project好可能會維持至少50個禮拜，亦都係差唔多一年。
咁所以我哋畀心機，每個星期六學習少少，慢慢轉化我哋成為一個更加優秀嘅雄性男人。
事不宜遲，我哋開始呢一趟旅程啦！
<超男之道>嘅第一個chapter，就係叫做Stop Hoping for a Completion of Anything in Life。
意思係，好多男人誤以為『事情總會有一日完結』。
例如，佢哋可能諗：『如果我工作夠勤力，咁去到某一日我就可以休息啦。』
又或者係：『我嘅女人某一日總會明白我，咁去到嗰一日佢就唔會再成日發我脾氣啦。』
又或者係：『我呢一刻做緊呢一樣我好憎嘅嘢，係因為到左某一日我就終於可以做我真正想做嘅嘢。』
呢一樣就係雄性男人思考嘅謬誤，總以為事情去到某一個位就會徹底地改變。
但係真相就係，唔好意思，事情係唔會有完結嘅一日。
只要生命不斷流動，我哋作為男人嘅挑戰就係你要不斷掙扎，不斷爭鬥，不斷打拼，用你獨有上天畀你嘅『禮物』，而去享受每一個當下。
正正係因為咁，我哋唔好再成日同自己講要『等到某一日，我哋先會做某樣嘢。』，唔好再等待所謂『奇蹟』或者『好嘅事情』出現。
唔好諗住你要等到你嘅財政身家去到某一個位，你先去做某樣嘢。
唔好諗住你要等到你嘅小朋友長大曬，離開屋企有能力照顧自己，你先去做某樣嘢。
唔好諗住你要等到你要完成所有其他人俾你嘅所謂『責任』，你先去做某樣嘢。
你知道你心裏面係有乜嘢好想嘅，所以由呢一刻開始，你應該每日花至少一個鐘去做一啲你一直等緊去做嘅事情。
你要開始做你熱愛做嘅嘢，一啲好連繫到你個心嘅事情，因為你每一日嘅『日常慣例同埋責任』正正喺度束縛緊你。
雖然某一啲事情係暫時嘅fantasy，但係大部分『你想做嘅嘢』之所以要延期，係因為你唔夠disciplined，對自己唔夠紀律。
家庭責任或者有限嘅金錢，從來都唔會阻止一個男人去做一樣『佢真係好想去做嘅嘢』，
大部份你同自己講做唔到嘅『原因』只係你畀自己嘅藉口，只係你唔用你嘅創意去諗下點樣做。
正如所有成功嘅創業家都知道，
resource／資源永遠唔係一個決定你成唔成功嘅因素，resourcefulness／你夠唔夠足智多謀，你能唔能夠有創意地去利用你僅有嘅資源，先至係致勝的關鍵。
所以你要做嘅第一步，就係要每日花至少一個鐘去開始做你熱愛嘅事情，容許你發掘並且分享你最大嘅『禮物』。
另一樣嘢，就係可能你會錯誤地假設『去到某一日，你嘅女人就會徹底地改變』。
咁樣諗就錯喇巴打，唔好再等待嗰一日嘅來臨，你必須假設佢永遠都唔會改變。
如果你女人嘅行為或者心情永遠都係咁難容忍，你應該離開佢， 唔好再回頭，因為真實係你唔能夠徹底改變一個人。
但係如果佢唔係咁難頂，只係間唔中有少少唔合你心意有啲麻煩，咁樣你就要明白佢好可能永遠都係咁：
因為呢個係雌性女人嘅本性特質，femininity係永遠都會變幻無窮，比較雜亂無章 ，比較複雜混亂。
所以下一次你察覺到自己嘗試去『fix』個女人，嘗試去『修補整理』佢，令到佢XYZ嘅問題唔再出現…
你要停止自己嘅行為，放鬆啲，攬住佢，讓佢知道即使佢係咁樣你都會愛佢， 唔好嘗試阻止佢抒發一啲『可能激嬲你』嘅行為。
永遠唔會完結嘅Emotional Drama係雌性女人嘅精神良藥， 你越係嘗試去用力『解決佢嘅問題』你只會越係徒勞無功。
你要練習嘅係，嘗試喺呢一啲發癲嘅時候，搵下femininity有趣之處，以一種幽默的角度去睇女性嘅特質，呢一種就係其中一樣你愛佢嘅表達方式。
當然亦都唔係叫你去縱容佢去不斷情感地欺負你啦，
不過你要明白好多時『女人發癲』只係一場霎眼間嘅風暴，你喺呢一場風暴之中處變不驚，唔好被佢影響你嘅情感，咁樣好快又會雨過天晴。
呢個世界同你嘅女人，係永遠永遠都會畀你好多預測唔到嘅挑戰。
如果你依家唔係充實地去活你嘅生命，勇敢地面對呢啲挑戰，咁樣你腦裏面『幻想美好嘅某一日』係永遠唔會出現。
所有曾經有意義地活過生命嘅男人都唔會去『等待某一日』，你嘅錢／你嘅女人／你嘅任何狀況永遠唔係你做唔到某樣嘢嘅主要原因；
你係時候感受一下你最想送乜嘢畀女人同世界，跟住做你今日能力之內嘅事情去滿足呢種慾望。
每一刻嘅等待都係每一刻嘅浪費，每一刻嘅浪費亦都係令到你人生目的含糊嘅原因。
所以今日畀你嘅action step就係：
請你開始每一日花一個鐘去做你心裏面知道自己想做嘅嘢，讓自己喺每日重複嘅routines裏面搵到自己嘅passion！
