Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
欸，失戀啦，點算呢？
我講緊嘅係 ，全世界男人女人都會面對嘅一個挑戰，就係當你同你曾經愛嘅人分手嘅時候，之後應該點樣處理呢？
首先想講，失戀呢種感覺真係唔知道點樣形容，如果你唔係冷血呢，你都知道 it fvcking hurts!
我仲好記得，喺我好幾年前大學畢業嘅時候，正正係嗰一個女仔開始對我冷淡，開始唔覆我whatsapp，開始玩好多mind games令到我不知所措嘅日子。
我嗰陣時仲係London，諗住幾個禮拜去環遊一下附近唔同嘅地方，但係因為呢啲咁樣嘅情緒起伏過山車，令到我冇曬mood去旅行；
而我亦都記得好清楚，當時我係住喺我best friend嗰度，日日見佢同佢女朋友恩恩愛愛咁樣，而我只喺自己一個喺度，諗緊返到香港仲有冇機會同呢個女仔喺埋一齊。
呢種咁樣嘅對照真係好諷刺，有啲妒忌，所以成個人都好頹，完全唔知道自己想點…
更重要嘅係，返咗去之後就終於『所謂分手』，正正式式去開始感受長達一年半嘅『失戀期』，接受成長嘅挑戰。
所以呢，如果你試過失戀又或者依家啱啱失戀，你都會好清楚明白嗰心真係好撚痛，個心真係會戚住戚住喺度掙扎。
問題係，當類似嘅事件喺你未來嘅日子再發生，你應該點樣處理呢？
以下我會分享幾點畀你去參考下。
＃1 唔好責怪個女仔令到你有咁痛苦嘅經歷，你一定要take full responsibility。
當年嘅我好白痴地用咗整整18個月先至get over咗呢條女，咁因為中間有好幾次以為可以喺埋一齊嘅煙幕，所以其實中間有好幾次又係再次跌返落谷底咁樣。
但係問心講，其實真係唔關個女仔點樣對你事，只係我自己喺度『自我虐待』無限放大失戀呢件事。
意思係：
係我自己成日無限loop一啲『失戀情歌』令自己對號入座，搞到自己成個受害者咁樣。
係我自己選擇去係睇返以前啲whatsapp記錄，以前啲相，以前啲片，不斷同自己講以往嘅日子有幾好。
係我自己選擇唔出去開始識其他好可能比佢更適合我嘅女仔，呃自己話呢個世界上冇女仔會啱我並且愛我。
我咁頹，我咁心痛，我咁封閉自己其實講到尾都係自己嘅責任。
失戀呢件事係一件事實，但係失戀之後你點樣去活你嘅生命係你嘅選擇，係完全係你控制範圍之內嘅事。
＃2 失戀之後真係需要一個療傷期嘅，但係療傷期嘅長短係你可以控制得到。
嗰時我好白痴地浪費咗18個月嘅青春先至識得成長，但係我有一個事業好成功嘅創業家friend，佢失戀之後，竟然可以用兩星期內搵返一個更正嘅女朋友，仲要依家拍拖已經拍咗超過一年幾。
佢嘅經歷更加淒慘，佢當時係同個ex喺歐洲去旅行，佢同我講因為有一段時間冇見，所以佢都feel到好似去旅行嘅時候，佢個ex嘅行為表現有少少唔同。
咁喺臨飛返香港前一晚，係佢個ex沖涼嘅時候，佢喺個ex嘅電話裏面發現咗一啲情慾短訊，原來佢個ex喺出面已經有其他仔。
FVCK，我個friend心諗，
但係佢好鎮定，佢之後自己一個就係西班牙嘅廣場上面行咗一整晚，諗咗好多嘢，到第二朝返返酒店。
跟住佢個ex問佢成晚去咗邊，佢就答佢：
『哦，冇咩呀出去行下咋。係喎，我哋返去班機係今晚黃昏，但係我啱啱另外買咗一班早啲返去嘅機，咁你自己因時間返去啦。』
意思係，我呢個friend好決心地決定自己一個早啲返去，並且之後完全冇再搵個ex。
而佢一個禮拜到，就開始出去識其他女仔，亦都係一個禮拜內搵到佢依家更正更索更適合佢嘅女朋友。
聽落去好似好難做得到，但係巴打你必須限制你『療傷期』嘅時間，接受已經失戀呢個事實，並且盡快讓自己知道原來世界上仲有好多索女係鍾意你，畀一個機會佢哋去認識你。
＃3 其實我哋都需要多謝我哋嘅ex，畀我哋經歷呢啲痛苦。
每個喺我哋生命出現同離開嘅人，其實都係一種隱藏嘅禮物。
就好似我嘅所謂ex…
如果佢冇咁樣做，我就唔會知道原來自己有幾咁needy，有幾咁唔識得愛自己，有幾近依賴人哋。
如果佢冇咁樣做，我就唔會有咁樣嘅動力去了解男女吸引力嘅真相，之後花數千個小時，喺唔同嘅書本／課程／實戰經驗等等學習溝女嘅奧秘之處。
如果佢冇咁樣做，我就唔會有機會去深刻地成長，唔會想去成為一個更有吸引力嘅男人，唔會深切地反思自己係一個點樣嘅人，並且點樣去建立一種我理想中嘅生活。
所以除咗我好多謝我同佢曾經創造一啲好開心嘅回憶俾我，我更加多謝佢畀咗好大嘅動力我去令自己成為一個更優秀更高價值嘅人。
所以我想問你，你嘅ex又畀咗啲乜嘢你呢？
佢令你學習咗啲乜嘢係終生有用架呢？
你可以點樣祝福佢成為一個更好嘅人呢？
即使呢一刻你未能夠一個宏觀的角度去看待呢件事，但係我可以同你講，我哋人生任何一件『當下覺得嘅大事』嘅事；
其實你一兩年後回頭望返，都只係一啲唔重要嘅小事；
重要嘅係，你能唔能夠喺呢啲小事上真係學習到你需要學習嘅課，跟住令自己真正嘅成長。
＃4 我哋明白曬以上幾點之後，你下一次breakup嘅時候你可以點樣準備呢？
第一，失戀發生之後，你第一件事一定要cut晒你同佢嘅所有contact。
佢嘅電話number，佢嘅whatsapp紀錄，佢嘅FB/IG/SC等等，所有嘢都要delete晒。
你肯咁樣做你一定會療傷得快好多，因為你每一次片面地淨係望番以前『開心嘅嘢』，你只係不斷製造『佢冇缺點』嘅假象，令自己覺得損失好似好大。
第二，你要set一個限期俾自己去『頹廢』，去深刻地感受呢種失戀嘅痛楚。
譬如你話我會畀自己一個禮拜，完全去感受有幾灰，咁樣你呢一個禮拜就可以係咁loop啲自我陶醉對號入座嘅失戀歌，去感受你作為所謂『受害者』嘅無奈。
但係你一個禮拜後必須接受現實，必須重新出發，必須畀一個機會其他索女溝你。
第三，失戀係一個好好『搵番自己』嘅機會，因為好多時拍拖我哋都會迷失咗自己，更加可能放棄咗自己好多嗜好，甚至係妥協咗自己一啲價值觀。
所以你要開始做番你一啲你一直好想做但係冇機會做嘅嘢，再次愛惜自己，再次珍惜自己同你身邊重要但係忽略咗嘅人。
第四，單身又係一個好好嘅機會去explore and have fun。
呢個時候又係可以做一啲你passionate嘅活動，有更大嘅自由去探險世界，有更多嘅時間去認識其他朋友同女仔，更加了解自己鍾意啲乜嘢。
以上就係好簡單但係好有用嘅失戀療程。
我知道我哋都唔想會有失戀嘅一日，但係你必須學識點樣去reframe成件事，
要明白愛一個人唔一定要擁有佢，
唔好畀自己嘅neediness搞到要箍住兩個人一齊，令到雙方都窒息。
正如我之前所講，love also includes letting someone go。
我哋要學識放手讓大家行返屬於大家嘅路，並且多謝佢曾經陪伴你經歷過一趟美好嘅旅程，然後衷心祝福佢同你都會有一個更加美好嘅生活。
