Yo! 歡迎嚟到新一集嘅Man The Fvck Up, 協助你創造一個你想要嘅戀愛生活。
今日想好快回答其中一位巴打email嘅問題。
總結嚟講,呢位巴打某一日喺大學嘅校園之中行過, 佢就見到有個幾cute嘅女仔自己坐咗喺度玩緊電話, 但係佢唔知點樣去approach佢。
因為佢同我講佢唔知應該講啲乜嘢, 所以佢想問我點樣去 approach一個自己坐喺度玩緊電話嘅女仔, 因為佢驚講完開場白之後唔知講啲乜嘢會dead air。
好, 第一樣我需要糾正你嘅係, 你唔好咁撚驚個conversation會慢慢熄滅咗, 呢一個mindset係唔會幫到你。
相反, 你應該擔心嘅係, “ 阿…我嘅磁場會唔會太強呢? 我個人咁正, 唔知呢個女仔承唔承受得到, 會唔會令到佢自卑喎 ;p”
如果將來有機會同你練習, 你能夠eye-to-eye望住一個好索又唔識嘅女仔一分鐘, 讓自己沉醉於喺呢一種嘅sexual tension之中。
你handle到呢樣嘢, 你以後就唔需要擔心怕唔知講啲乜嘢。
個女仔見到你個人咁冷靜咁鎮定, 佢都會覺得喺你身邊好舒服, 佢會總結你係一個高地位嘅男人, 並且開始對你產生吸引, 會期待你去領導佢去展開一個精彩嘅探險。
第二, 好多男人都成日驚對住一個吸引佢嘅女人, 唔知自己應該講啲乜嘢。
但係你有冇留意過其實你個腦, 無時無刻都突然之間有一啲思想, 一啲ideas, 一啲諗法係會自動出現呢?
如果你試過冥想/meditation你就知㗎喇, 係非常之困難去停止同自己講唔去諗嘢。
因為嗰一刻你叫自己唔好諗嘢, 其實就喺度諗緊點樣唔好諗嘢, 係咪好撚矛盾複雜呢? Lol
所以根本問題唔係在於你諗唔到有乜嘢同人哋講, 問題的癥結, 係在於你唔夠自由,唔夠free去100%毫無保留地表達自己!
所以只要你願意去讓自己freeflow, 唔好成日諗住plan要講啲咩, 並且視乎當時嘅場合環境去講一啲發生喺嗰一個時間空間嘅事物, 成個conversation會係自然流露好多!
第三, 你明白咗我以上嘅兩點, 咁我依家就教你點樣用一個”萬用嘅開場白”, 令你喺任何場合都可以同一個陌生女仔打開話題 🙂
記住, 雖然你可以參考我以下教你嘅句子, 但係最好你都係擁有一個屬於你自己嘅萬用開場白。
咁等我用返聽眾畀我個場合做例子啦。通常我嘅所謂 “go-to line”其實好簡單, 唔需要好似啲PUA將成件事複雜化, 搞到你個人咁鬼緊張,咁鬼生硬…
就係, 我通常第一句就會講, “Hi”, 同時間保持住我之前成日教你嘅嘴角微微向上翹起的奸笑,成個身體唔好傾向前,應該傾番後少少, 最重要係放鬆啲…
咁無論喺咩場合,尤其是當佢坐喺度或者企喺度撳電話, 依個女仔通常都會望一望你同你say個hi.
跟住你可以同佢講, “我知道有少少random, 不過啱啱見到你喺度玩電話, 覺得你幾cute, 所以想好快過嚟同你say hi.”
咁跟住佢應該會同你say hello, 或者佢會講話”Oh, 多謝曬.”
雖然呢個時候佢都係唔係太講嘢, 但係你要明白,佢啱啱先由佢玩電話嘅狀態,恢復意識同一個陌生人傾計, 所以你唔可以expect得太多。
你之後就可以講, “係囉, 其實我有一條規則㗎, 當我見到一個幾cute嘅女仔嘅時候, 如果我覺得佢性格應該都幾好,我就至少需要行過去同佢say hi…”
你係呢一句說話, 其實開始導入一啲好玩並且有挑戰性嘅元素, 因為呢個女仔潛意識地覺得佢要證明畀你睇,佢嘅性格都真係幾好 😛
咁呢度,有幾個可能出現嘅狀況:
第一, 如果佢好好玩地同你講, “haha係咩,你又知道我好性格?’
你就可以搭返佢, “好簡單啫, 物以類聚吖嘛, 所以我實feel到格。”
第二, 如果佢challenge你, “唔係喇, 我性格好差㗎…”
你就可以搭返佢, “Uh, 你唔好咁講, 你真係唔好咁講, 你應該都知道, 性格差嘅女仔比性格好嘅女仔更吸引:P”
第三, 如果呢條女好有自信地同你講, “係囉, 你啲taste都幾好喎, 因為好多男仔都咁樣同我講過。”
呢個時候, 你就可以搭返佢, “哈! 你都幾識吹架喎, 我諗我要重新評估你呢個人 :P”
當然, 我再重複多次, 無論你點樣答佢,都係保持嗰種好玩加有挑戰性嘅structure去大家互相揶揄, 冇壓力地互相挑逗下。
呢個就係你可以用到嘅萬用開場白, 並且知道開完頭之後可以點樣flow落去。
如果你唔想講咁多嘢, 又夠膽出去玩放啲, 咁當你見到一個女仔,自己坐喺度或者企喺度玩緊電話嘅時候…
你可以斯斯然行過去佢隔離 (唔係正面對住佢呀!), 戚起你嘅奸笑, 可以等佢望你或者未望你嘅時候, 同佢講, “點呀, 個男仔覆咗你未呀 :P”
我相信十個有九個女仔都會即刻笑咗, 咁你又開咗個充滿magic moment充滿emotion嘅靚開場白喇!
