Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
今日同埋嚟緊一連幾集，我哋將會有一啲好大開眼界嘅資訊教各位巴打。
如果你有學習男女吸引力一段時間，你應該明白溝女除咗係一種藝術，更加係一種科學。
我哋之所以話溝女係一種科學，原因係好多所講嘅嘢都可以追溯返『進化論』嘅基礎；
雖然進化論只係一種解釋人類繁衍嘅科學假設／理論，但係裏面嘅解釋都對我哋學習有非常大嘅參考價值。
咁所以當你明白『進化論』之後，
你就可以利用呢個『工具』去明白點解女人會有某啲行為，
跟住去預測喺唔同嘅環境條件下，你作為男人應該點樣做去增加自己嘅吸引力。
所以我哋首先好快地講下『進化論』先，之後再講下女人真正想要啲乜嘢，再講下有吸引力嘅男人應該具備乜嘢嘅質素。
（Tip：我哋呢幾日將會講及好多關於『依賴性／Neediness』同吸引力嘅關係。）
好，我哋開始！
達爾文提倡嘅『進化論』，係建基於兩條非常基本嘅理論：
＃1 Survival of the Fittest 適者生存
#2 Natural Selection 自然選擇（物競天擇）
=> 我哋祖先之所以會進化+繁衍後代，並唔係因為純粹你係一個好人或者壞人。
我哋之所以能夠生存，係因為佢哋最能夠適應環境嘅變化，
所以佢哋就能夠有最大機會，去將佢哋嘅基因傳送去畀下一代。
『適者生存』講緊就係：
幾萬年前甚至幾千年前嘅人類部落社會，都係屬於『唔係你死就係我亡』，所以我哋都係習慣去互相廝殺（其他人或者動物）先至能夠生存到。
『自然選擇』講緊就係：
我哋祖先嘅『適應／變化／改變』喺對生存有利，所以佢哋嘅adaptive traits就會傳畀我哋下一代，慢慢形成今時今日人類嘅模樣。
Anyway，以上就係如果你有讀過bio都應該聽過嘅科學理論，咁佢同溝女有咩關係呢？
個關係就係，『進化論』能夠提供一條線索，解釋『點解女人會以某種特定方式去選擇男人』。
現今大部分嘅研究，都係集中講緊長遠嘅交配／long term mating，
所以佢哋會話你知一個『有資源，有社會地位，身體健康強壯』嘅男人係最有交配價值，喺女人最想要。
但係幾萬年前，人類仲未識得點樣用雪櫃保存食物，
而佢哋又成日『遊牧』住唔同嘅山洞，喺人類仲未研發『語言』，仲未識得點樣『耕種／保存資源』嘅時候，
女人又係點樣選擇值得交配嘅男人呢？
=》『進化論』嘅歷史話畀我哋知：
女人咁多年嚟揀男人嘅機制，除咗佢望到你外表健康之外，
其實女人係集中去睇你自然流露嘅behaviors，睇下你自然行為係咪屬於『能夠將來成功打獵／得到權力嘅男人』。
所以你要留意，『有資源，有社會地位』只係現今社會嘅一種指標／indicator，
話畀個女人知呢個男人有無一種『性格特質／Personality Traits』能夠帶領自己去增加佢嘅權力／影響力／成功；
女人唔係睇你而家外表有幾身光頸靚／有幾威，
因為你有機會係富二代攞咗筆遺產喺度扮有錢扮成功，而唔係靠你嘅個人特質去成功。
我哋講及behaviors嘅時候，你估下女人見到你『邊一種行為』嘅時候，
佢就會馬上知道你係低價值／低吸引力／將來好難成功？
個答案就係：你嘅『依賴性／Neediness』！
至於點解如果你嘅行為好needy嘅時候，你就絕對溝唔到女呢，我哋聽日嗰集再講！