Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
今日好興奮，因為即將share比你嘅嘢係好正！
Approach Anxiety，即係驚走過去打開口同女仔傾計，係好多男士都會遇上嘅困難；
就等我好快分享四個mindset，協助你解決呢個問題。
Mindset＃1：無論我當時有乜嘢心理狀態，都係一個最好嘅狀態去同女仔傾計。
其中一個男人畀自己唔approach最大嘅藉口，
就係同自己講話嗰一刻佢未ready好，佢仲未『入狀態』，佢仲未『熱身』，
所以佢就同自己講話『不如買杯嘢飲先啦／不如去個廁所先啦／不如下一首歌先啦／不如等我high啲先啦／不如睇定啲先啦』等等。
真相就係：
你越係『等多陣先』，你越係搵藉口唔去approach嗰個女仔，你之後會發現越嚟越大壓力去再做呢個動作。
你個腦就會比越嚟越多藉口你唔去approach，你亦都會有越來越多負面嘅諗法點解你唔應該approach。
所以由呢刻開始，每次你見到合眼緣嘅女仔，無論你有心理準備好未，你都要馬上行動，亦都係我哋第二點講嘅嘢。
Mindset＃2 ：我隻腳行嘅速度，一定要快過我個腦諗到嘢嘅速度。
你要開始訓練自己，每逢你見到合眼緣嘅女仔嘅時候，你要馬上郁你隻腳行去佢嘅方向。
即使你未諗到要講咩好，即使你最後會唔會真係停低佢開口講嘢；
喺你啱啱學習approach女仔嘅階段，
你一定要訓練到自己有一個條件反射嘅自動反應，就係『當我見到心動嘅女仔，我就會即刻行過去，拉近我同佢嘅距離』。
當你develop到有呢一種habit，當你習慣將自己放喺靚女附近，並且感受佢令你產生嘅緊張感；
你下一步再去學習點樣開口講嘢將會更加容易，亦都係同我哋第三點講嘅嘢有關。
Mindset＃3：當我開口say hi，我就已經係一個贏家。
事實就係，無論係乜嘢場合，90%嘅男人都係驚做打開口say hi嘅人，幾乎個個人都係等緊對方『將冰山劈開』。
咁所以，當你能夠淨係講一句半秒嘅Hi，你就已經係馬上將自己放喺Top10%嘅位置；
咁簡單直接就可以拋離對手並且成功嘅嘢，你唔係唔做吖嘛！？
再加上，我強調咗好多次：
ACTION/行動係永遠重要過OUTCOME/結果。
如果我哋將成功嘅定義同未發生嘅『結果』掛鈎，咁我哋人生快唔快樂就會係取決於永遠無法100%肯定，將來先至發生嘅結果。
相反，如果我哋將成功嘅定義同『當下嘅actions』掛鈎，咁我哋人生嘅快樂係絕對100%控制喺自己手上面；
只要你願意去take action行動，無論結果係點樣，你都係100%成功，你都係100%快樂。
所以要好好記住呢個approach必須有嘅心態，就係：當我開口say hi，我就已經係一個贏家。
Mindset＃4： 每一次嘅approach你都問下自己：
『吖！呢一刻我可以做啲乜嘢，令到我會好好享受呢個moment呢？What can I do to have a great time？』
太多男人都將opening／開場白嘅一刻睇得太重要，覺得如果佢哋唔能夠製造一個『完美嘅』approach，佢哋就一定溝女失敗。
Bro，that’s not true。
開場白只係你同女仔傾計嘅interaction，佔千分之一，萬分之一，億分之一嘅一樣小事，
對你將來同佢嘅任何可能性根本冇咩太大影響。
你要focus嘅，只係喺每一次對話之中，你可以點樣令到成件事變得好好玩呢？
點樣可以令到大家都enjoy嗰十幾秒／幾分鐘／甚至幾十分鐘嘅對話呢？
如果三唔識七，你一開頭就問人哋好深入好deep好heavy嘅問題，係人都會驚咗你啦。
相反，如果你係抱住一個『好奇睇下有乜得意嘢可以發生』嘅心態，無論你同個女仔將來會唔會有咩事發生，你哋都能夠喺當下享受溝通嘅過程。
以上就係解決『驚開口同女仔傾計』必須擁有嘅四個mindsets，我哋總結多次：
Mindset＃1：無論我當時有乜嘢心理狀態，都係一個最好嘅狀態去同女仔傾計。
Mindset＃2：我隻腳行嘅速度，一定要快過我個腦諗到嘢嘅速度。
Mindset＃3：當我開口say hi，我就已經係一個贏家。
Mindset＃4：每一次approach都問下自己：『吖！呢一刻我可以做啲乜嘢，令到我會好好享受呢個moment呢？』
只要你開金口，你就已經係比起90%嘅其他人更大機會贏；
以上咁寶貴幾乎必贏嘅溝女態度，請你由今日開始好好背熟佢哋嘞！