Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
嚟到超男之道系列嘅第5集，今集嘅主題係叫做Know Your Real Edge and Don’t Fake it！
意思就係，我哋需要知道自己真正嘅極限，知道有啲乜嘢我哋係真係冇可能做得到，而同時間擴闊我哋現有嘅技能同能力，增加自己嘅感染力。
雖然一個敢於面對自己恐懼，面對阻力繼續向上游，活喺佢嘅舒適範圍之外嘅男人係好值得仰慕；
有時候我哋都必須承認，作為人類，你同我都有一啲限制，你同我都有唔同嘅成長限度，我哋都有各自各嘅命運等待我哋去踏上。
譬如，你雄心壯志想征服喜馬拉雅山，但係你連獅子山都未行過，你咁樣去挑戰你就一定死硬；
你一定要逐步逐步嚟，慢慢增加自己嘅skills level，先有機會達到目標。
又或者你好想好似Elon Musk咁有大志去令人類上火星，但係你連自己第一個startup business都未賺到錢，你係唔會有足夠嘅skills level去應付更大嘅困難。
所以我哋冇需要特登去扮我哋比呢一刻真正嘅我哋聰明，去扮我哋比其他人更加有遠見，呢一個就係第一點。
第二點就係，即使你要有謙卑嘅心，
你亦都唔應該因為『唔好意思』而喺度扮廢，喺度『留力』，喺度『讓賽』，唔全力以赴做到最好。
譬如，你依家做緊某樣工作賺緊錢。
你要問下自己：『其實有啲乜嘢恐懼，正在限制緊我去進一步貢獻人類更多，或者進一步創造更多價值賺更多錢，或者進一步去以一種創意享受嘅方法去賺錢呢？』
假設你係完全零恐懼，咩都唔怕，你估你呢一刻會唔會仍然淨係搵咁多錢呢？
（BTW，我哋之所以用錢做例子，只係因為錢可以量化，容易啲畀你get到你係咪真係實現緊自己所有嘅潛能。）
個重點係：
你嘅edge／你暫時能力嘅邊緣，正正係阻止緊你去全面發揮你嘅潛能，令到你妥協於你可以為世界帶來最好禮物嘅能力。
換句話講：你有冇因為自己嘅一啲恐懼，而限制limit咗自己真正能夠做到嘅事情呢？
其實你比任何人更加清楚自己有咩驚，例如好驚去冒險，好驚會失敗，甚至好驚會成功等等；
但係你依家覺得生活都幾舒服，所以你好驚如果你放棄現時嘅工作，搭隻腳出去自己創業，你嘅lifestyle將會改變到比之前更差；
即使你已經想創業想咗十幾年，即使你知道依家份工唔係最適合你，即使你內心知道自己有更大嘅熱情同潛能喺另一方面；
但係由於你好驚會做得比之前差，你選擇妥協，繼續生活喺一個表面相對安全，表面相對舒服，但係內心同靈魂已經死亡嘅一種無生氣嘅生活方式。
你有冇見過一啲人所謂『返工』嘅時候係充滿活力，充滿激情，充滿啟發性嘅能量去創造結果啊嗱？
有呢一種energy嘅人，正正係一個living in his edge嘅人嘅特徵，
佢係充滿自我動力，佢係願意勤力工作因為佢熱愛佢做嘅嘢，佢亦都係一個你可以信賴嘅人。
一個知道自己極限嘅人，並且同時願意繼續lean towards his edge，活喺佢極限邊緣，每日將自己放喺恐懼之中嘅人係最能夠信任同有啟發性嘅。
千祈唔好做果一個因為恐懼而放棄嘅人，
一個每次遇到困難就會瑟縮番自己嘅comfort zone之中嘅人，一個唔願意每一日都嘗試體驗一啲啲恐懼嘅人。
一個真正自由嘅男人，係擁有絕對自由去承認自己嘅恐懼；
但係即使係咁，
佢仍然會繼續將自己放喺恐懼嘅邊緣，
仍然繼續每日係屬於佢嘅道路take action，
仍然繼續創造自己最想要嘅生活。
喺恐懼面前，喺自己極限面前，喺唔熟識嘅挑戰面前，你又會唔會咁樣做呢？