Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
今日想好快講講所謂嘅Alpha Male／雄性男人嘅三個最大特點，點解我哋要略略搞清楚咩先至係叫Alpha呢？
就係因為你都應該聽過，上一兩代嘅人以前成日都會用『大男人』呢個term去形容一啲好專制野蠻，甚至會用暴力欺負女人嘅男人仆街。
亦都可能係因為咁，會令到好多我哋呢一代嘅巴打們好驚去做咗嗰一種嘅仆街大男人，
所以就走向另一個極端，變得越嚟越溫柔體貼，斯文有禮等等。
但係你都應該知道，nice guys係永遠溝唔到女嘅，就算佢哋溝到，佢哋好快都會畀人哋cheat咗都唔知咩事 。
咁所以我哋點先可以唔做嗰一種『大男人』嘅同時，又可以做一個有男子氣概嘅真正雄性男人呢？
#1 第一種嘅Alpha Male特徵，就係佢有一種領導人嘅態度，佢係會take charge。
女人係鍾意一個領袖，一個勇敢做決定嘅男人。
即使佢做嘅決定最後係錯誤，但係如果佢知道佢想要啲乜嘢，跟住願意冒險去做一個決定，咁樣嘅態度已經係有吸引力。
女人最唔鍾意嘅就係一啲猶豫不決嘅男人，一啲左諗右諗都唔知下一步去邊到嘅男人。
所以你要記住嘅係：Lead，Lead， Lead！
無論你肯唔肯定個結果，你都必須盡快做一個決定，向前踏出第一步去睇下結果係點樣。
＃2 第二種嘅Alpha Male特徵，就係有自信嘅男人。
『有自信』嘅意思係，
你係一個愛自己嘅人，你係一個尊重自己嘅人，你係一個知道自己大方向嘅人，
亦都係因為咁樣人哋先至會尊重你。
當你係擁有一種對自己嘅certainty，對自己嘅肯定，你做嘢就能夠更加果斷，更加堅定自信。
＃3 第三種嘅Alpha Male特徵，就係一個絕對控製到自己情緒嘅男人。
佢嘅情感要係好似石頭咁堅硬，唔會因為外在嘅事物輕易影響自己嘅情緒，包括女人間唔中畀佢嘅shit test。
點解呢？
因為你都應該知道，女人嘅情感就好似每一刻流動緊嘅春水，
所以當佢間唔中情緒去到谷底嘅時候，如果你又因為佢唔開心而搞到自己唔開心，咁女人就唔可以依靠你去帶佢離開谷底！
女人唔想要一個大喊包，一個控制唔到自己情緒嘅男人。
咁當然呢個你需要好好平衡啦，你當然要有一種同情體諒嘅心，去感受其他人嘅痛苦辛酸啦，
但係你都唔可以因為呢啲情感嘅流動令到自己都隨波逐流，大失所措。
你亦都唔好去否認自己嘅情感，因為抑壓自己情緒亦都係唔健康嘅。
感到唔開心或者覺得好嬲係冇問題嘅，但係千祈唔可以讓自己當時嗰一刻嘅情感而佔領咗你做理性決定嘅能力。
最後畀個Bonus Tip你：
當你感到情緒高漲嘅時候，
當你feel到自己開始被外來嘅事物影響內在心態嘅時候，
當你察覺到自己開始瀨嘢之前，
你必須喺你做任何決定之前停低三四十秒，
跟住深呼吸吸氣4秒，落你個肚嘅腹部位置並且令佢脹肚，
之後閉氣4秒，再呼氣6至8秒。
如果你可以重複做呢十零秒嘅動作2至3組，我保證你之後做嘅決定會畀30秒前嘅理智好多。
唔信嘅話，你下次俾人挑釁嘅時候試一試，之後再話我知你嘅決定有幾聰明得多啦！