Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
你應該知道：我最近寫完一本免費43頁嘅溝女書，讓你學識10樣女人暗地裡想你知道嘅秘密。
你仲未下載嘅話，可以去㩒一下片中description嗰條link，或者去www.manthefvckup.com/freebook 去下載呢本書。
返返嚟今日嘅主題：好多男士同女仔傾計嘅時候都會遇到一個問題 ，就係唔知道可以點樣令個conversation不斷延伸，怕有『唔知講咩好』嘅情況出現。
我今日就會教你一個對話技巧，令到你想傾幾耐都得！
我教你呢一招叫做『Conversational Threading』，即係點樣利用對方畀你嘅資料，製造無限嘅脈絡去傾計，並且同時唔會令大家有『好chur』『好唔自然』嘅感覺。
首先講下好多男士犯錯嘅地方先，就係佢哋會一問一答，或者不停問佢問題嘅方式去同女仔傾偈。
例如：個男仔會問：『依，你成日都嚟玩㗎？』跟住個女仔話：『唔係呀』
跟住個男仔就話：『哦，平時鍾意做啲咩呀？』 跟住個女仔話：『跳下舞，做下運動，睇下書囉。』
跟住個男仔就話：『哦，你做邊行㗎？』跟住個女仔就開始炆炆地hea答佢：『 Finance囉。』
跟住個男仔仲要唔知死繼續問：『哦，幾好呀，你係邊度返工架？』跟住個女仔就會西面唔撚理你！
點解呢？
就係因為呢啲咁空洞無物嘅對話，根本就唔會產生任何一啲『火花』或者『連繫』令到個女仔覺得同你有connection。
你係咁interview人哋，更加會令到佢燥底覺得你好撚煩膠！
對話就好似織衫咁樣，你係需要巧妙地利用簡單容易嘅『原材料』去製造一樣靚靚嘅『製成品』。
你需要做嘅，就係利用佢講嘢時候某一part嘅字句，用嗰一個小資料去繼續。
例如：
個女仔同你講：『我好鍾意去希臘㗎， 果度好靚。』
即使你未去過，你都可以講：『啊，Santorini好似好正囉，嗰度啲人好似好chill好寫意咁。』或者你都可以講：『係咩，希臘有咩令你特別鍾意㗎？』
聽落好似普普通通嘅一啲對話，但係就係因為咁樣，你顯示到你係有留心聽佢講嘢， 並且嘗試去將佢講嘅嘢+你嘅經驗去連繫一齊。
你既可以顯示你對希臘嘅好奇，你亦都可以分享你對希臘的印象，或者點解你都咁熱愛呢個地方。
你點樣做，都係嘗試將一件事連繫到你同佢之間可以relate到嘅情感上面。
進階少少呢，你可以留意返佢頭先講嗰一句 『我好鍾意去希臘㗎， 果度好靚。』，其實係有四樣嘢你可以講嘅。
嗰四個部分就係： ＃1我好鍾意 ＃2 去 ＃3 希臘 ＃4 果度好靚
跟住你就去連繫呢啲『對話材料』：
＃1我好鍾意 ：你就可以講，『點解你咁鍾意嗰度嘅？』或者『我都好鍾意㗎，係我其中一個暑假最愛去嘅地方。』
＃2 去 ：你就可以講，『除咗希臘之外，你仲有去過邊度呀？』或者『 你係咪成日去㗎？』
＃3 希臘 ：你就可以講，『我覺得希臘都好舒服 。』或者『我就未去過希臘嘞，嗰度有咩咁正呢？』
＃4 果度好靚：你就可以講，『我都覺呀，嗰度真係好靚好浪漫，好適合影婚紗相。』或者『係咩？你覺得有咩特別靚香港冇㗎？』
總之每一次佢講嘢，每一句句子總會有一啲小資料畀你繼續flow落去。
你需要做嘅，就係細心聆聽，之後揀其中一個 thread，嘗試連繫到你自己嘅睇法或者感受，嘗試去emotionally relate落佢度。
多啲練習，你就可以無限loop，同個女仔不斷『雞啄唔斷』，你哋就可以傾成晚計喇！