Yo！我喺MTFU嘅Man神啊。
各位巴打有冇曾經試過妒忌其他人擁有你想要嘅嘢呢？
譬如話：『頂，條仆街明明冇我咁高大靚仔有錢，但係條女竟然咁索！？』
又或者你行過街上聽到Fuooon一聲有架車喺你面前停低，
望過隔離見到有條靚仔戴住副超揸住架藍黑色嘅Bugatti Chiron，
當時你又會唔會心諗
『你條木契富二代，未識搵錢就學人揸靚車，肯定你老豆送畀你㗎喇，鬼唔望你一陣炒車呀你！』
LOL…
事實就係：我哋由細細個就開始被朋友屋企人或者社會宗教灌輸話『某啲情緒就係壞／某啲情緒就係負面』；
所以好多時我哋都會覺得『自豪／性慾望／或者妒忌』等等嘅emotions全部都係唔應該去感受。
但係我今日就想為各位巴打解釋點解其實每一種情緒，每一種emotion，
都係教緊你一啲關於你自己嘅嘢，並且解釋點解jealousy係一個好好嘅學習工具。
＃1 簡單嚟講：『妒忌』嘅出現，其實就係每當你覺得某啲嘢，可能會威脅到你原本重視嘅嘢嘅存在。
譬如話：如果你重視你嘅工作，
當你見到隔離team個個新人喺你嘅department做得好好，你就會開始妒忌佢，因為你覺得佢威脅到你份工或者升職機會。
又例如：如果你重視你條女嘅話，當你見到佢眼甘甘望住嗰個靚仔model嘅時候，
你可能就會妒忌嗰條友，因為你唔想嗰條仔會威脅你哋之間嘅感情。
但係點解每逢你觀察到『妒忌』出現嘅時候，其實你係應該歡迎呢種情感呢？
＃2 答案就係：因為jealousy係話咗畀你知，其實你嘅人生有啲乜嘢你係會重視。
譬如話：如果你妒忌其他拍拖有女嘅朋友，可能就係一種信號話你知『其實暗地裏你都想拍拖，而唔係淨係想ONS』。
又例如：如果你妒忌某個人嘅IG表面上嘅lifestyle好似好正，影親嘅相都好靚，好似成日都冇乜煩惱咁；
咁樣可能就係一種信號話你知你為咗工作賺錢而忘記咗放下假，或者你係時候都需要平衡一下自己social嘅一面。
簡單嚟講：你妒忌嘅嘢，好多時都係你想要嘅嘢。
所以下次『妒忌』出現嘅時候，你不妨聽下佢講啲乜嘢，或者你都會發掘更多關於自己嘅真相。
＃3 另一樣嘢就係：『妒忌』喺能夠俾你見識到自己嘅黑暗面，
因為好多時『妒忌』都係會透露一啲你嘗試隱藏嘗試欺騙自己嘅事情。
『妒忌』其實就係一盞趙照耀內心嘅燈，佢係會搵到你內心嘅恐懼或者insecurities。
譬如你條女同你講話覺得『公司新嚟嗰個阿John好型仔』，你就突然之間妒忌一個你唔認識嘅人，點解會發生呢樣嘢呢？
你咁驚嘅原因係咪因為驚你女朋友會離開你呢？
又或者當呢個畫面有機會出現嘅時候，會唔會係再一次『印證』『其實我唔夠好／唔值得擁有女朋友』嘅恐懼呢？
又或者你係咪好驚當你條女離開你嘅時候，你就唔能夠搵到一個同樣咁好或者更加好嘅女人呢？ 咁樣又係咪揭穿咗你『低自尊』嘅真相呢？
重點就係：你妒忌嘅感覺，好多時都會比起你嘅伴侶更加了解你，所以請你好好聆聽佢同你分享嘅說話。
＃4 最後想講嘅就係：你係必須學習點樣將『妒忌』呢種emotion轉化成為一種慶祝嘅celebration，並且從對方身上學習。
意思喺：如果你都想成為一個有錢人，你就必須首先唔好因為『妒忌』而痛恨辱罵佢，
唔係嘅話你潛意識地永遠都唔會將自己變成一個有錢人。
Instead，你係應該欣賞並且慶祝人哋嘅成功，並且睇下有咩方法可以從佢身上學到嘢。
又例如：如果你發現大部分女仔都鍾意你班上某個男仔。
Instead of嘗試同其他無女嘅男仔杯葛中傷佢，你不如慶祝佢咁有吸引力，並且嘗試從佢身上學習點解咁多女仔都鐘意佢。
以上就係各位巴打將來你面對『妒忌』呢種情感需要有嘅態度，
希望你都能夠細心聆聽自己嘅emotions從而學習更多關於自己嘅嘢！
鍾意今集嘅話就like，留言俾我知並且share比你值得分享嘅朋友睇啦， 下集再見你！