Yo! 歡迎嚟到新一集嘅Man The Fvck Up, 協助你創造一個你想要嘅戀愛生活。
上一集, 我問咗你”你對於你自己需要去學溝女有冇保留呢?”, 並且我哋講咗點解如果有人對你批判, 其實只係顯示佢哋嘅self-image受到你嘅威脅, 所以佢想講說話令你氣餒, 令你繼續原地踏步, 好似佢哋咁樣過返一啲平庸嘅生活…
好啦我哋廢話少講, 以下係四大原因或者四大恐懼, 點解你可能驚畀人知道你去學溝女。
#1可能有人認為, 學溝女係一種操縱女人嘅行為, 學完之後係用嚟擺佈人哋嘅…
我畀兩個情景你幻想一下…
情景A:
你學咗一個新技巧, 你而家識得點樣令一個女仔笑, 識得點樣令佢好興奮好想同你connect…
咁你出街某一日, 你識咗一個你鍾意嘅女仔,你同佢傾傾下計, 你知道係時候用呢個技巧去引佢笑…
但係你猶疑, 你冇咁樣做到, 因為你覺得你喺度操控緊女人去笑, 你唔想成為一個支配人哋選擇嘅人, 你繼續選擇隨遇而安, 睇下命運點樣安排你哋之間嘅故事。
情景B:
你啱啱睇咗一本雜誌, 佢話hold住一個強而有力嘅eye contact 眼神交流係會令女仔對你產生吸引力。
咁你出街某一日, 你識咗一個你鍾意嘅女仔,你哋有講有笑, 你醒起係時候要有strong eye contact。
你勇敢地hold住呢個眼神, hold得比你平時耐, 大約8-10秒, 之後個女仔對你產生吸引力, 覺得同你好啱傾, 之後你哋仲有一個美好嘅晚上。
問題嚟啦, 以上依兩個情況, 其實有咩分別呢?
點解有啲男士覺得hold住eye contact唔係一個操控人哋嘅行為, 但係又覺得用語言技巧或者其他嘢就係邪惡呢?
事實上, 兩者根本冇分別, 你都係有策略地做某一啲嘢, 嘗試得到某一啲結果。
你諗下, 一個花兩三個鐘set頭化妝嘅女人, 佢知道男人係比較視覺既動物, 佢咁樣做吸引更多男人又係唔係嘗試去操控男人呢? 佢係唔係誤導男人嘅判斷呢? 佢係唔係個人唔夠真呢?
以上男女所做嘅嘢根本就冇問題, 你要明白嘅係 , 全世界都嘗試做一啲嘢或者唔做一啲嘢, 去增加佢哋得到想要嘅嘢嘅機會率 。
如果有啲人同你講, “你唔應該去學溝女, just be yourself, 做番自己就得㗎喇, 屬於你嘅嘢始終會屬於你, ” 你估佢當時都做緊咩呀? 佢又咪係嘗試去操控你嘅行為?!
對於我嚟講, manipulation, 操控人意味著令到某啲人做一啲未必佢哋自己想做嘅嘢;
但係influence, 影響人, 感染人係去領導人哋做一啲至少某一part嘅佢自己係想去做嘅嘢 。
其實呢啲影響力, 操控力, 說服力每一日隨時隨地喺你身邊發生緊, 咁你自己去增加你喺世界嘅感染力其實有咩問題? 你覺得點解咁多巴打聽咗Man The Fvck Up 之後佢哋嘅dating life 會豐富咗咁多?
你有你嘅夢想, 你有你嘅願景, 你take action 付諸行動, 你創造你想要嘅成果, 你所做嘅嘢全部都係想影響一個結果, 所以去感染其他人根本唔係一件邪惡嘅事, 尤其是當你係領導其他人去做一啲佢哋心裏面好想做, 但係又唔夠膽做嘅事 。
咩係真正嘅邪惡? 無知先至係真正嘅邪惡, 明知自己有不足都唔去改善先至係邪惡, 人哋見到你進步唔抵得想拉番你落嚟先至係邪惡 。
所以你學溝女, 學點樣去感染佢, 帶領佢去一個更好嘅地方,你嘅intention意向係想 “Leave Women Better Than You Found Them”, 咁樣你學溝女根本係一件令世界變得更美好嘅事!
#2 可能有人認為,如果你要學溝女, 承認自己唔夠man, 自己依家唔係男人…
我想你幻想下呢一個情景:
有兩個男人喺度打網球, 咁佢哋個level係差唔, 贏大家嘅勝算都係50/50。
男人A就決定佢以後都想贏男人B, 佢想進步, 所以佢請咗一個網球教練,每一個星期都想好幾堂去打好基礎,去學新嘅技巧。
喺呢個過程, 佢有進步嘅日子, 亦都有失敗嘅日子, 但係隨著日積月累, 男人A打網球越嚟越叻。
過咗好幾個月之後, 男人A同男人B打咗一場比賽, 男人A贏咗男人B九條街。
男人B有啲嬲, 就問男人A, “ 頂你呀, 做乜勁撚咗咁多嘅?”
男人A 就答佢, “冇乜嘢啫, 我請咗個私人教練, 呢幾個月佢係咁幫我操, 幫我補返底啫!”
男人B有啲驚奇咁樣答佢, “ 嘩, 幾時變得咁撚醒㗎你? 我都應該請返個教練, 我打反手有啲廢…”
打完波之後呢, 佢哋就換咗件衫, 出咗去一齊飲杯嘢。
去到覺bar嗰度, 啱啱輸咗波嘅男人B見到條索女自己一個喺個吧枱度飲嘢, 作為一個social嘅男人,佢就直接行咗埋去hi條女。
過多幾分鐘之後, 男人A見到條女雙眼發光, 對男人B非常著迷。
男人B之後返嚟, 攞咗條女個電話同埋已經約咗聽日見面…
男人A目瞪口呆咁樣問, “ 你啱啱做咗啲乜嘢呀!? 咁撚勁咁快攞咗人哋電話仲約埋人哋聽日出街!?”
男人B好淡定咁樣講, “冇乜嘢啫, 我請咗個私人教練, 呢幾個月佢係咁幫我操點樣去溝女, 幫我補返底啫!”
男人A就平復情緒地同佢講, “ 咁撚醒嘅你, 我都應該請返個教練, 我有時唔知同女仔講啲乜好…”
故事就完咗喇, 問題就嚟喇:
呢兩位巴打, 有冇因為佢哋個兄弟喺某一方面需要幫忙而睇小對方? 有冇因為佢哋喺某一方面冇對方咁叻, 於是覺得對方唔係男人?
唯一一樣嘢可以令到一個人唔係男人, 就係當你知道自己既弱點嘅時候, 而呢個弱點係影響緊你生命某樣好重要嘅嘢時候, 你都唔嘗試去改善佢, 你先至唔係男人囉!
但係當你察覺自己嘅弱點, 承認自己需要人哋幫忙, 去學習改善你嘅弱點, 將你嘅弱點變為優點, 呢個先係真正有力量Man The Fvck Up 嘅男人囉!