Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
今日星期五，即係又嚟到weekend假期，又係一個離開屋企出去social嘅好時段。
問題係，你plan好咗今個星期出去邊度玩未呢？
我之所以咁講，係因為我見到有好多巴打好想溝女溝叻啲，
但係同時又好驚出去現實世界take action，運用佢哋喺MTFU所學嘅技能；
所以如果持續咁樣，係會嚴重影響你進步嘅速度，亦都係一個惡性循環。
因為你溝唔到女，好多時係因為你唔夠大膽take action；
而你唔出去現實世界嘗試，你就唔能夠鍛鍊自己更加大膽；
但係你唔出去嘅原因，又係因為你好驚預計唔到可能會發生嘅事情。
所以你學習嘅過程基本上冇開始過，
因為你想成為一個womanizer，先決條件就係你要習慣放自己喺身邊有女人嘅位置。
矛盾就係，你驚嘅時候就唔想出街，但係你唔出街又唔可以進步，
最後唯一可以做嘅，就係決定留喺屋企閱讀多啲，學習多啲。
雖然我好鼓勵你不斷學習不斷研究，
但係壞消息就係：單憑閱讀學習係唔能夠神奇地令到一個女仔坐喺你大髀上面un。
所以如果你係新手，
唯一一個我可以幫到你解決嘅方案就係，令到出去social出去玩出去蒲呢件事，變得簡單容易冇壓力。
所以我想你首先暫時放棄任何遙遠宏大嘅目標理想，
唔好覺得出去識女仔就係想搵到『十分有十分嘅完美女神做你女朋友』，
又或者出去social就係為咗cold approach女仔，
又或者希望能夠色誘佢跟住當晚即刻上床，
又或者同佢傾偈希望能夠攞到佢電話就為之成功等等。
以上呢啲『目標性』嘅嘢，暫時對你嚟講都係不切實際，
只會令到你太大壓力，減低你出去social嘅意欲。
Instead，你係應該定下一啲比較細嘅暫時性目標，而我想你記住你嘅目標有三個。
第一個目標就係：
喺任何social嘅環境場合或者夜場裡面，能夠正常地運作，感覺自己喺嗰一個環境自然地function。
第二個目標就係：
喺任何social嘅環境場合或者夜場裡面，能夠正常地同某啲人有正常嘅對話交談。
最後第三個目標就係：
喺任何social嘅環境場合或者夜場裡面，能夠同某一個女仔或者某一班女仔正常地傾計五分鐘，而唔會感到緊張或者負面。
只有當你做到以上三個簡單目標嘅時候，
首先能夠正常喺某個場合正常運作，
之後能夠正常地同某個人有簡單嘅對話，
最後能夠同某一位女仔正常地傾計五分鐘，
你先至能夠邁向，將來能夠色誘你睇上眼嘅高質索女嘅現實。
所以今集就係咁精簡，麻煩你依家即刻寫低你想開始係邊一個場合簡單練習，
唔好再留喺屋企學習，今個星期開始出去同人social並且識下女仔喇！
希望今集幫到你！