Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
我哋琴日講咗，睇AV喺毀滅男人嘅第一大元兇，
今日將會講下第二同第三樣毀滅男人嘅嘢。
第二樣嘢就係Social Media／社交媒體！
Social Media絕對係呢十年『騷擾／侵犯你私人空間』嘅頭號通緝犯。
無論係FB／IG／SC／YT，外國有研究發現好多男人每一日花起碼3.2小時，喺呢啲途徑上面應酬；
而相反，你呢啲時間係絕對可以有效率地做一啲令你生活有真正改善嘅嘢。
Social Media最大嘅問題係，
佢會訓練你去不斷每隔十幾分鐘就需要少少嘅dopamine hit，每次少少嘅多巴胺『感覺良好』嘅刺激，
令你每一個鐘都需要去check一下自己嘅Whatsapp／睇下IG女神嘅新相新story／睇下有冇FB update／睇下有冇新YT片等等。
咁樣『不斷需要外來刺激／不斷需要其他人認同你like你』嘅行為，係會絕對殲滅你能夠專注唔分心地工作嘅能力。
所以除咗你上癮不斷渴求新嘅virtual stimulation，
你更加會不斷同人哋比較『睇下邊個生活更加美滿』，令到自己嘅自信心自尊心大大下降。
你要明白：
Social Media唔係用嚟social㗎，所有所謂social嘅野都係假㗎，
Social Media成立嘅真正目的，係用嚟畀人哋做personal marketing。
你依家follow嘅人，
全部都只會post一啲最興奮／最有動感／最精彩／最成功嘅某一刻，
佢哋會將一秒鐘嘅快樂，放大為『睇落好似每一秒都好快樂』嘅虛擬影像；
好多人亦都忘記咗呢樣嘢，跟住唔小心將人哋執過塑造過嘅精彩時刻，同自己『平凡平淡沉悶』嘅生活比較，
跟住搞到自己好唔開心，好唔滿足，成日覺得自己好似miss咗啲最正嘅嘢，
每個人都患上俗稱嘅FOMO，Fear Of Missing Out。
我畀你嘅建議就係：請你開始嚴肅認真地限制你用Social Media嘅習慣。
Social Media嚟緊將會嘥你更多時間，
令你不斷needy地追求人哋嘅like／validation認同，
摧毀你能夠delay gratification嘅能力，
同埋會潛意識地令你覺得自己生活好似比人哋差。
另外一樣嘢就係，
唔該你用嗰啲時間投資喺現實生活嘅real social life，
喺現實生活結識真正嘅朋友，喺現實生活溝女，喺現實生活同其他真人溝通；
只有喺現實生活建立你真正嘅社交帝國，你先至能夠喺現實生活實現真實嘅夢想。
毀滅男人嘅第三樣元兇，就係睇電視或者打機。
如果你有申請Netflix／Amazon Prime，你都知道能夠一次過睇曬一季劇集係有幾咁邪惡。
你係好容易唔小心花咗成個週末，十幾廿個鐘坐喺度去追完一套劇。
打機亦都係一樣，但係打機之所以係更加危險，係因為佢會令到好多男人有一種虛擬嘅『成就感』。
你每一次升呢，
每一次為你嘅主角買新武器，
每一次開拓一條遊戲主線副線，
都係呃緊你嘅大腦話『你嘅人生係進步緊』，所以你每一日都會好俾心機地花N個鐘去不斷喺虛擬世界『進步』。
我又有咩建議？
Well，
你聽得MTFU，
你都知道 we’re all about levelling up in your REAL life，
你喺想現實生活中level up㗎嘛！
所以請你培養一啲有創造力嘅日常習慣，你唔需要擔心Game of Thrones幾時會再做；
畀啲目標自己今個禮拜要推胸推多十磅，
今個禮拜要跑多2km，
今個禮拜要同多一個新女仔傾偈等等。
另外如果你真係想『娛樂下』，你必須培養自己靜靜地都能夠睇15分鐘有趣嘅書，增長一下你嘅知識智慧。
如果你連呢樣嘢都冇紀律做唔到，就證明你真係中咗毒，
你再唔改善控制唔到自己嘅話，任何你想要嘅理想都係空談！
我哋聽日，再講埋第四第五種毒癮，希望今集幫到你！