求其喺Google大神搜尋壞男人或者渣男呢兩個terms，你都會搵到過百篇文章或者影片話你知呢啲人有咩邪惡特質，
又或者做好心教導女士點樣提防呢啲衰人，甚至可以扭轉局勢收復啲壞男人。
但係好多人就冇解釋過：點解所謂嘅壞男人永遠都係咁有吸引力呢？
點解佢哋永遠都會贏一啲傳統嘅好男人或者溫柔體貼嘅暖男呢？
咁所以今日我想好快解釋畀大家聽，點解badboy咁有吸引力。
如果你係巴打嘅話，就請你嘗試模仿以下嘅形象，去提升自己嘅性吸引力；如果你係絲打嘅話，亦都歡迎你睇完呢條片之後，話我知幫唔幫到你更加了解自己嘅內心。
好！第一大原因點解一啲『傳統地著住皮褸擔住支煙喺度破壞法紀』嘅男士咁sexy…
…就係因為badboy呢個形象暗示，呢個男人係會跟自己訂立嘅遊戲規則去活自己嘅人生；
佢係一個反叛者，唔願意做一個畀人蝦都唔識出聲嘅死廢柴；
而且，佢亦都臭名遠播地畀人知道佢鍾意溝女食女，擁有無窮無盡性慾嘅男士。
女人之所以會被呢種形象吸引，就係因為女人希望自己可以成為『唯一一個改變到壞男人』嘅女人，從而去滿足覺得自己好special嘅心理慾望。
咁所以自古以嚟，女人做任何嘢背後嘅推動力，好多時都係想尋找一個Alpha男，然後打贏其他女人獨霸Alpha男，並且取得寶貴嘅Alpha精子，生育出最優秀嘅後代。
呢種嘅生理慾望喺非常之強大，好多時就算女人明知『壞男人』對佢未必好，但係佢身體都冇辦法抵抗呢種biological嘅吸引力！
第二個原因點解『壞男人』咁有吸引力，係因為badboy呢個形象就係迎合緊女人內心『想曳』嘅慾望，令到好多趁後生想wild想玩下嘅女士，一定會選擇呢啲壞男人去探索去冒險，去ONS等等。
你試想像下：喺酒吧夜店嘅環境裏面，男人A係一個成日笑，待人親切友善，同女人傾計下下都噏曬頭認同對方，工作非常勤奮稱職嘅專業醫生／律師／會計師。
冇錯，男人A的確係會畀到一種好warm嘅感覺你，你亦都覺得佢好聰明好叻好醒目。
但係如果你喺女嘅話，你嗰晚其實淨係想chill下玩下白痴地笑下，你會唔會揀呢啲擺到明係正正直直悶爆嘅『乖仔好人』去做你提供資源嘅『男朋友角色』呢？
定係你會調返轉揀一啲男人B，揀一個著到型一型擺到明落嚟溝女，有自信地互相揶揄挑戰佢，而且充滿神秘感唔太知佢背景係咩人嘅壞男人呢？
你明白以上呢兩個形象A同B嘅分別，你就會知道點解短期內女人一定係會揀壞男人！
第三個原因就因為：社會過去一直都將壞男人塑造成為食過無數女，性愛上較為優越有經驗嘅男士。
無論係傳統嘅占士甸，Steve McQueen，馬龍白蘭度，或者任何James Bond角色；定係近代嘅George Clooney，Johnny Depp，Colin Farrell，Dicaprio，C朗或者Justin Bieber…
…呢啲全部都係一啲女人明知佢壞，但係身體都不能自控地希望改變到佢嘅例子；證明你越係食得多女，女人先至會暗地裏越係想要你！
第四個好簡單嘅原因就係：『壞男人』通常都係一啲最好玩嘅人，好多時女人都只係想 just have FUN！
尤其喺呢一個物質豐裕嘅年代，無論係返緊學定係做緊嘢嘅女士，都係有『趁後生盡量瘋狂party多啲』嘅心態，都會想趁青春嘅時候玩放啲玩盡啲。
事實上：Facebook嘅COO Sheryl Sandberg亦曾經公開地鼓勵女士們趁後生就要同多啲性感壞男人一齊，令自己將來有美好嘅回憶；
但係要settle down嘅時候，就要搵返一啲主張男女平等，會做家務，會照顧屋企人嘅住家好男人。
(Ref：“When looking for a life partner, my advice to women is date all of them: the bad boys, the cool boys, the commitment-phobic boys, the crazy boys. But do not marry them. The things that make the bad boys sexy do not make them good husbands. When it comes time to settle down, find someone who wants an equal partner. Someone who thinks women should be smart, opinionated and ambitious. Someone who values fairness and expects or, even better, wants to do his share in the home. These men exist and, trust me, over time, nothing is sexier.”)
換句子話嚟講，『壞男人』就係一啲可以令到女人感受到刺激又興奮，開party高潮迭起嘅男士；咁所以如果你夠好玩有能力提供FUN嘅話，女人就一定會黐埋落你到！
最後第五個最深層嘅原因，就係因為『壞男人』係一個做自己想做嘅嘢，鍾意幾時做就幾時做，並且會設計出一個充滿自由lifestyle比自己嘅人！
追隨freedom嘅男人之所以有吸引力，係因為佢唔似大部分人會妥協於現狀，佢唔願意一世坐喺office裡面重複又重複好似機械人咁樣做啲戇鳩嘢；
相反，『壞男人』係一啲願意打破常規，反叛地做少數人會做嘅事情，令自己各方面得到freedom嘅『自由西』！
咁所以巴打，『壞男人』性格特質係同時吸引到女人嘅身體，情感，同埋佢生理上programming。
雖然你絕對唔需要做一個殺人放火嘅真正壞人先可以吸引到女人；
但係如果你想增加自己吸引力嘅話，你又會唔會繼續選擇做一個聽聽話話嘅順民乖仔，
定係會開始學識點樣反叛啲曳啲，去塑造一個壞男人形象呢？下集見！
