Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
嚟到超男之道系列嘅第11集，
今集嘅concept亦都係好多男人比較難接受嘅一種挑戰，
就係叫做Enjoy Your Friends’ Criticism，你要學識去享受朋友對你嘅批評。
一個男人能唔能夠容納另一個男人嘅直接批評，係一種量度去睇下佢有冇咁嘅能耐，去接受雄性嘅力量。
如果男人同雄性力量冇一種良好的關係（例如佢同佢父親嘅關係唔好），
呢個男人就好容易成個女人咁樣，聽到其他男人對佢嘅批評嘅時候，佢就會好容易受到傷害或者變得非常防衛保護自己。
所以作者建議我哋，
大約每星期一次，我哋都應該坐低同我哋身邊最親密嘅男性朋友，討論一下大家近排有咩搞作，並且同大家坦白講自己有乜嘢喺好驚去做。
跟住你嘅朋友就應該畀一個行為實驗你做，一啲action steps去揭露一啲關於自己內心嘅嘢，從而協助你得到更多自由。
譬如你可能同你嘅朋友講：
『我好想同我嘅秘書Denise搞嘢啊，但係我又好驚會傷害我嘅老婆囉，我好驚我老婆會之後發現我出軌…』
咁你嘅朋友可能會challenge你講：
『屌，你講Denise都講咗半年啦，你知唔知你自己其實係嘥緊你嘅能量係呢啲fantasy之中架？
一係你就聽晚約佢出嚟扑9佢，一係你就徹徹底底放棄呢個念頭，唔撚好再同我哋講同一番說話，okay？』
雖然聽落好un耳，但係作為雄性男人嘅你，你必須接受其他男人嘅challenge，
因為其實佢哋喺幫緊你，去解決你平庸嘅猶豫不決。
你考慮清楚之後就可以回答：『屌，你都講得啱嘅，我決定唔會咁做啦。
仔細諗下，其實我覺得我同老婆嘅婚姻係比起我對Denise嘅慾望更加重要，
所以我會放棄出軌呢個念頭，將我嘅focus放返喺其他priorities上面啦，多謝你巴打。』
所以你最close嘅男性朋友，喺應該願意去challenge你平庸嘅諗法，
並且建議一種實質嘅行動令你可以離開呢個『無限loop嘅漩渦裏面』，咁樣你先至能夠move on行返一條屬於你嘅道路。
而你亦都絕對需要去願意接受冷酷嘅真相，咁樣你先至能夠徹底成長。
好朋友係唔應該容忍對方嘅平庸，所以如果你係『活喺自己能力的邊緣』，
你其他男性朋友應該尊重你，但係你頹嘅時候亦都唔可以縱容你。
佢哋應該尊重你嘅恐懼，但係亦都必須因為佢哋對你嘅『兄弟情』，佢哋需要繼續去間接地『鞭策你』去超越自己。
所以如果呢一刻你唔鍾意其他男仔friend對你嘅挑戰，好可能係因為你同你父親有一啲『未解決嘅問題』，無論你爸爸仲在唔在生。
『父親嘅力量』就係一種tough love，一種因為愛你所以挑戰你並且引導你嘅能量。
如果你生命冇呢一種嘅masculine force，你人生嘅方向就會好模糊，
你亦都會因為你嘅『模棱兩可／優柔寡斷／遲疑不決』不斷迂迴曲折地唔知自己走去邊度。
所以你身邊最close嘅男仔friend，係應該能夠協助你提供一種光明，令你更加清晰自己想行嘅方向。
Btw，各位巴打，
曾經一位同佢嘅學生總共製造過千億財富嘅business mentor同我講：
Show me your friends and I’ll show you your future.
意思係：
你只需要畀我睇到你圍繞喺你身邊嘅朋友係乜嘢質素，我就能夠預測得到你將來嘅成就。
『近朱者赤，近墨者黑』呢條道理我相信你同我小學都已經開始聽過，
但係你又有冇認真地篩選你身邊嘅朋友呢？
你嘅朋友係咪因為『大家住得近／大家讀同一間中學大學』所以一直keep住聯絡？
定係你係有意識地因為大家有類似嘅宏大目標+有益嗜好，
大家都願意push大家一齊進步，大家都願意喺危難嘅時候協助大家，大家鍾意正面嘅mindset鍾意不斷令自己成長，
所以先至一直keep住聯絡呢？
你想成功嘅話，
你喺絕對需要選擇一啲同你一樣都係『願意活喺自己邊緣』嘅男性朋友，一啲願意勇敢面對自己恐懼，並且不斷擴闊自己舒適範圍嘅男人。
只有呢一種嘅男人先至能夠一邊『愛你』，一邊『唔會太過保護你』去讓你接受現實嘅挑戰。
所以喺呢一個禮拜，請你重新審視一下，
你身邊最親密嘅三至五個男性朋友，究竟係拖緊你落水『維持現狀』，
定係令你不斷進步raise you up，一齊去到各自理想嘅彼岸。
希望今集幫到你！
