Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
可能有好多巴打都曾經問過自己：
唔知幾時先算係學完溝女呢？
唔知幾時先算係學習嘅道路上『畢業』呢？
唔知幾時先可以『放鬆落嚟，終於咩都唔使諗去享受人生』呢？
如果你係咁樣諗，我有個壞消息要話你知啊…
呢條道路係去到你死嗰一日先至會完結！
史丹福大學嘅心理學女教授Carol Dweck，喺2006年寫咗一本書叫做《 Mindset：How You Can Fulfill Your Potential》。
Carol同我哋講：呢個世界上只有兩種人，第一種人擁有Fixed Mindset，第二種人擁有Growth Mindset。
第一種擁有Fixed Mindset嘅人，佢哋覺得所有嘢都係整定嘅，並且覺得佢哋已經係一件『完成品』。
佢哋已經過咗學習嘅階段，而因為佢哋已經『成咗人』，所以佢哋已經唔能夠改變佢哋嘅未來。
相反， 第二種擁有Growth Mindset嘅人，
佢哋睇嘅世界係一個永遠唔會完，永遠都有得進步，永遠都可以進化改變嘅一個世界。
所以佢哋覺得自己永遠係『work in progress』，係一件『正在被打造嘅事物』，佢哋係唔會有完嘅一日。
喺佢哋眼中，life is either growing or dying；
如果你唔係成長緊，你就係死亡緊。
所以去返我哋一開頭嘅問題，究竟『溝女』會唔會有學完嘅一日呢？
又或者係套用其他任何嘅技能，究竟『學炒股』會唔會有學完嘅一日呢？
究竟『學打網球』會唔會有學完嘅一日呢？
究竟『學英文／普通話／西班牙文』會唔會有學完嘅一日呢？
究竟『學人類大腦構造』會唔會有學完嘅一日呢？
究竟『學唱歌跳舞拉小提琴』會唔會有學完嘅一日呢？
個答案當然係No啦！
任何一種你想精通嘅技能，
任何一種需要花時間每一日去練習嘅skills，
任何一種需要重複又重複又重複做相同嘅嘢去達到mastery世界級水平嘅東西，
都係唔會有完嘅一日！
歷史可以話畀我哋知：人類喺不停進化，係會將『以往認為無可能做到嘅事物』逐一實現。
無數嘅奧運紀錄，攀山紀錄，潛水紀錄，或者任何世界健力士大全嘅紀錄，
都話咗畀我哋知『人類係有能力不斷擴闊自己嘅極限』。
無論你想精通任何一種技能，
包括學溝女／學新嘅語言／學計數／學功夫／學機械工程／學滑雪／學做運動／學做間諜黑客等等，
所有嘢都有下一個關，所有嘢都有更勁嘅level，所有嘢都有更進階嘅技巧去學習。
你想成為世界上嘅Top1%，你就一定要保持『終生學習』呢一種嘅edge，呢一種嘅優勢。
唔好諗住讀完大學／讀完master／係law firm做到partner／係銀行做到亞洲區CEO，你之後就諗住停止學習。
每逢你自滿，
每逢你覺得『識曬所有嘢』，
每逢你覺得生活一切過得特別『舒服滿足』，
你就係正正步向一個黑暗嘅未來，
正正被眼前嘅『名成利就』蒙蔽，
正正暗地裏被其他人超越你原本擁有嘅優勢。
問題係：呢一刻你擁有Fixed Mindset定係Growth Mindset呢？
當你開始發覺自己溝到女，越來越多女仔鍾意你嘅時候，你又會唔會自滿而放棄繼續精通呢一門學問呢？
你又會唔會喺你人生其他嘅任何一方面，永遠抱著一個謙虛學習嘅心，永遠準備放棄舊有嘅觀念同自我意識，
去迎接新嘅資訊，迎接新嘅改變，迎接新嘅自己呢？
你咁勤力每日聽得我哋MTFU，我相信你喺識得點樣揀嘅，
希望今集幫到你！
