Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
今集嘅靈感係最近同一位朋友傾計時得番嚟嘅，咁佢就問我：
佢識咗呢個女仔一段時間，同佢出過一次街，佢就覺得個女仔應該對佢有好感但係又唔肯定 ，
所以佢就問我應唔應該問佢哋一個mutual friend嘅女仔，叫佢幫手睇下嗰個女仔係咪對佢有好感。
咁我呢個friend講呢個情況嘅時候，不禁令我諗起當年中學嘅時候，
我都好似曾經做過呢啲小朋友嘢，成日諗住如果可以令到我個mutual friend幫手，令到對方知道你鍾意佢，咁樣就好似容易啲溝到女喇。
而家睇返真係好白痴，青春期嘅小朋友果然係特別單純lol
所以我之後強烈建議呢個friend絕對唔可以咁樣做，因為你想像一下呢個畫面：
當你叫Mary幫你睇下Susan鍾唔鍾意你，出現嘅情況就係佢哋兩個就會係一個唔知乜嘢嘅環境情況下講緊你， 嗰狀態就係佢哋兩個VS你一個。
係咁樣嘅環境條件下，Susan就需要即刻諗一個Yes或者No嘅答案，佢就會諗下同你有冇機會發展。
但係你唔會想有呢種情況出現嘅，因為女仔係應該經常follow your lead，經常跟住你嘅步伐走，你係應該經常有power去決定下一步去邊度；
你咁樣叫Mary幫你問Susan，你就其實係將一切話事權供奉畀Susan，所以你唔應該咁樣做。
咁點先至可以知道女仔鍾唔鍾意你呢？
你就要遵守呢條永遠不變嘅定律：
就係永遠永遠假設佢係鍾意你！
無論呢樣係唔係事實都好，你有咁樣嘅mindset係利多於弊，永遠都會幫到你。
你諗下，如果你首先假設佢鍾意你，你就會take action去發掘下呢一個係咪真相。
相反，如果你首先假設佢唔鍾意你，咁樣即使佢係鍾意你，你都會搵好多藉口去證明佢唔鍾意你，甚至潛意識地做一啲討厭嘅行為令到佢真係唔鍾意你。
明白咗呢一點之後，咁不如等我再畀多三種最常見女仔畀你嘅訊號／signals，讓你知道佢哋對你有冇興趣。
Level 1：就係當你哋兩個喺度玩緊串緊嘅時候，佢輕輕地打你手臂／肚腩／膊頭等等身體部位。
女仔對周圍嘅環境係非常敏感嘅，尤其是佢哋幾呎內嘅私人空間，所以如果佢對你冇興趣，佢係幾乎唔會嘗試同你有任何嘅身體接觸。
Level 2： 佢同你傾計嘅時候，佢都幾踴躍參與你哋之間嘅討論。
更重要嘅係，當你哋嗰一個討論話題完結嘅時候，佢會唔會有意識地主動再搵話題同你繼續傾計呢？
如果會呢，bro，佢喺冧緊你！
又或者無論係bar，party，學校，工作office，參加嘅活動等等呢一啲social嘅場合，
每次你哋傾完計之後，如果過咗一陣佢再主動返嚟搵你傾計，呢個係一個好好嘅訊息話你知佢好大機會鍾意你！
最後最大嘅hints，就係Level 3：
佢開始喺你面前sell自己，想證明自己有幾好，暗地裏希望得到你嘅認同或者讚賞。
女仔會做得比較『靜靜雞』嘅，但係個重點係：
佢會開始話你知一啲關於佢好正嘅嘢，佢曾經做過一啲乜嘢好勁嘅嘢，同你講佢玩過skydiving，去過邊度旅行等等；
證明自己係一個好玩鍾意探險嘅女仔，證明自己內心有幾好，嘗試去保護自己嘅自我形象等等。
佢之所以會去嘗試sell自己qualify自己有幾好，都係因為佢care你對佢嘅睇法，佢介意你唔鍾意佢。
我相信你明白我講咩嘅，咁所以我哋總結一下今集講嘅重點：
＃1 永遠都要假設佢對你有興趣，咁樣係會對你溝女整體上利多於弊。
＃2 永遠永遠都唔好問你哋嘅mutual friend個女仔係咪鍾意你，尤其是係叫佢啲朋友幫你搵下答案。
＃3 三樣女仔鍾意你嘅時候畀你嘅signals：
Level 1：當你哋兩個喺度玩緊串緊嘅時候，佢輕輕地打你手臂／肚腩／膊頭等等身體部位。
Level 2：佢同你傾計嘅時候，佢都幾踴躍參與你哋之間嘅討論；而且當你完結咗個conversation之後，佢會再主動同你傾偈。
Level 3：佢開始喺你面前sell自己qualify自己，想證明自己有幾好，暗地裏希望得到你嘅認同或者讚賞。