Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
嚟到超男之道系列嘅第13集，今集嘅主題就係叫做 Be Willing to Change Everything in Your Life。
意思係：
一個男人一定要有心理準備，某啲時候佢必須100%根據當時嘅purpose去活佢嘅生命，將生活嘅每一部分都同佢『當下嘅目的』連成一致；
但係去到某一個階段，
佢有可能需要100%放棄佢任何特定嘅生活方式，100%放棄原本佢辛辛苦苦建立嘅野，跟住重新嚟過。
佢一定要有能力去適應一啲『完全唔知道自己想做啲咩』嘅階段，
進入一個『不可預知／睇唔清楚』嘅period，去尋找『下一個願景』或者『下一個人生目的』。
呢啲cycle，
呢啲某段時間『強而有力／有目的性地take action』，
但係之後某段時間『唔太清楚下一步應該做咩』嘅循環，係對於一個不斷進化嘅男人嚟講會好自然出現嘅事。
你應該記得我之前同你講過『洋蔥的比喻』啊呵？
我同你講過，當你係活喺自己嘅邊緣，你就會開始搵到自己某個階段嘅人生目的／人生任務；
而當你能夠大約向著你『高地位』嘅道路進發，
喺你面前嘅第一樣嘢，喺你面前你覺得有機會係屬於你嘅工作，你就應該去征服佢先。
因為當你能夠dominate佢，你個人亦都會隨之成長進化，
而好可能三五七年之內，你第一層嘅任務就會完成，
呢層表面嘅洋蔥皮亦都會剝落，第二層嘅任務亦都會出現。
當你征服完佢之後，你又會再次進化，
你就會好似蛇咁樣脫咗舊嗰層皮，獲得新嘅一層皮，你就會得到另一趟嘅『英雄旅程』。
你咁樣每次征服完一樣嘢再征服另一樣嘢，你每次就會越嚟越接近洋蔥嘅核心，如此類推。
好多時，我哋讀書期間或者啱啱出嚟做嘢冇耐嘅所謂『purpose』，
其實係由我哋老豆老母或者童年經歷人哋賦予比我哋嘅一啲ideas。
譬如你係出生於一個醫學世家，所以你身邊嘅人甚至你自己都覺得，你應該都做返『拯救生命』嘅醫生。
又或者相反地，正正喺忍受住咁多年咁多人逼你做一啲唔係你意願嘅嘢，你就專登去做一個『傷害生命』嘅反叛者。
無論呢一刻你喺幾多歲，或者去到邊一個階段，
你係好清楚有啲乜嘢係心裏面好想好想做，有啲乜嘢係好想好想嘗試，
又或者好似對某啲嘢特別好奇，特別有興趣，特別有耐性等等。
你一定要開始回應你自己心裡面嘅calling，
你先至能夠真正『從心出發』，以你最真實嘅deep purpose，彰顯你嘅人生價值。
所以點解你見到咁多人，尤其係香港，
係搵到好多錢，係得到好多物質享受，係得到好多社會『接受／標籤嘅所謂成功』，
但係佢哋心靈好空虛，從工作得唔到滿足感。
原因就係：
佢哋當時嘅成功即使畀到佢哋一剎那嘅開心，呢種感覺都唔會維持好耐，
因為佢哋仲未正式邁向自己真正嘅deep life purpose；
又或者佢哋嗰一個階段嘅purpose已經完成，佢哋係時候『重新出發』，尋找下一個可以令自己成長嘅人生目的。
譬如話：
你可能細個嘅時候好鍾意打籃球嘅，所以由六歲開始你就不斷練習，不斷進步，由校隊打到去港隊，勁到18歲打埋CBA。
但係去到某啲位，可能到你25歲嘅時候，你發覺籃球已經唔再係你既passion；
可能你發覺原來咁多年你都好dry，未溝過一條女，你會突然之間對溝女好有興趣，
之後發覺學習溝女先至係你嘅passion，呢個時候『精通你嘅溝女skills』就會變成你生嘅purpose。
到你三十幾歲嘅時候，可能突然之間你會對『拯救動物』特別有感覺，feel到上天好似呼喚你去做啲嘢，
咁樣到時候『拯救動物』又會慢慢成為你新嘅life purpose。
換言之，每過五／七／十年，一啲原本你好有熱情嘅嘢，可能會突然之間變得無咁有啟發性，冇咁有興趣；
你可能係嗰個『大project』之中嘅使命已經完成，
你可能覺得對呢個『大project』已經無憾，
你可能甚至會好期待呢個『大project』快啲完結，
呢啲全部都係好大嘅徵兆，
話畀你知你係時候乾乾淨淨地『準備清場』，為自己下一個layer嘅『洋蔥層』做準備，迎接下一個興奮嘅使命。
可能會有段時間你係會『漂流』，呢個階段係唔需要太急，
因為你要畀少少時間自己去沉澱一下，等待下一個啟發你嘅遠景。
你需要保持open-minded嘅心態，用一個開放嘅態度，迎接你下一個任務。
而當佢嚟到嘅時候，佢好多時未必係100%清晰，
但係你會feel到佢係能夠觸動你嘅心，所以你都應該take action去慢慢develop呢種『你感覺係正確嘅衝動』。
就係咁樣，呢種嘅cycle每隔幾年就會重複，直至你去到最底層嘅洋蔥核心；
到時嗰一個就係最深入你靈魂，
最接近你calling，
最啟發到你嘅願景，
最令你興奮由朝到晚去做嘢嘅人生任務，
你將會愛上每一秒嘅生命。