Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
今日想好快教各位巴打一個鮮為人知嘅原因，點解好多男人出去date嘅時候死咗都唔知咩事。
首先有三樣細微嘅basic重點我想你記住：
＃1 女人係能夠直覺地非常精準地知道自己係咪『俾人追緊』；
每次佢感覺到你想喺佢身上得到某啲嘢，佢嘅身價就會頓時提升。
＃2 每當女人嘅身價開始提升嘅時候，
意思就係女人就會意識到你鍾意佢，佢就會開始吊高嚟賣，play hard to get，而你就會開始失去control，失去控制權。
＃3 當你開始失去控制，你嘅選擇好多時都一係『追佢再追得肉緊啲』（呢種行為更加會令到女人攞曬所有power），
你一係直接放棄。以上呢兩個選擇都唔會係你想要嘅嘢。
所以預防永遠勝於治療，
解決嘅辦法就係一開頭你要謹記，唔好放棄屬於你嘅dating power；
而其中一個最好嘅方法去keep control，就係永遠唔好約會期間主動畀晒錢。
當你唔再顯示傳統1-2-1男女約會，男人最後會比錢請女人食飯嘅時候，
你就能夠防止女人感覺你係『追緊佢』，防止佢覺得你處於求偶階段。
我當然唔係叫你『永遠唔好請女人食飯喇』，
我只係反對你有一種舊有傳統觀念，去利用『金錢／利益／著數』等等嘅外在因素，去嘗試令到女人鍾意你。
喺你一開頭認識／見面一啲有吸引力嘅女人嘅時候，你應該擁有咩心態呢？
最好嘅心態就係：
『呢個女人都好似幾nice嘅，不過我始終有保留。如果我真係想睇清楚啲，或者我都可以投資少少嘅時間金錢飲杯咖啡睇下嘅…』
明唔明？
你要畀佢少少嘅機會，去證明畀你睇，佢除咗表面幾靚女幾好身材之外，佢嘅性格人格道德操守仍然係一流先至得；
而你畀佢嘅機會，絕對冇需要要自己畀錢去一個完整嘅date囉！
再加上，如果你有『要畀錢去date，令到女人鍾意你』呢一種諗法，
你對女人嚟講一早就已經非常冇吸引力，你嘅態度同埋low self-esteem將會令所有女人厭惡。
你應該點樣做呢？
＃1 如果你真係控制唔到自己一定要畀錢請女人食飯，
唔該你至少用呢種心態，就係：『我想去呢間我最愛嘅餐廳食飯，如果你想嚟，我都歡迎你join我嘅。』
＃2 如果你真係決定去畀錢，至少你要講清楚你係為自己而去做，你唔係為條女而去做。
點都好，以上兩點都係唔係最好嘅策略。
約女仔出街最好都係creative啲，有創意啲，防止做一啲類似會同女人講『我願意花錢去得到你嘅注意力』嘅潛台詞。
所以instead of 傳統嘅dinner dates，
我比較主張你去做一啲social dates，做一啲一早已經包含有趣對話元素同刺激感嘅活動。
例如去一齊一大班人行山，略略喺某一啲較大型嘅公園行，
一齊去睇一啲藝術展覽，參觀一啲你身處嘅城市比較人少去嘅特色地區，又或者邀請佢去個friend嘅party。
因為講到尾，第一次就同一個『唔知你鍾唔鍾意』嘅陌生人，
一對一花幾個鐘坐喺一張枱食飯，最後唔知道你應唔應該畀錢定係AA制，呢種過時嘅策略已經失去效力。
所以唔該你依家花幾分鐘，諗下十種活動你係可以同女仔一齊去做；
而呢啲活動係唔需要點樣花錢甚至免費，但係裏面活動包含一啲有趣嘅對話，一啲冒險刺激嘅元素。
搞掂之後，你就馬上知道以後你任何嘅dates係應該做啲咩，並且防止自己再思考『應唔應該畀錢』呢啲無謂問題。
你哋之間嘅dates，亦都可以集中去玩／just to have fun，
而唔會令到雙方有好大壓力去『求偶』，玩樂期間亦都一早有好多有趣嘅對話元素係裏面。
最正嘅就係，你就能夠慳番好多錢，
首先投資喺自己身上，並且將來投資係一啲真係值得你投資嘅人身上。
希望今集幫到你！