Yo! 歡迎嚟到新一集嘅Man The Fvck Up,協助你創造一個你想要嘅戀愛生活。
今日想回答聽眾一條問題, 咁佢send email過嚟嘅時候呢,其實個標題係叫做”唔係幾鐘意做運動點吸引女性?”
咁但係佢都打得幾大段嘢, 總括嚟講呢, 佢就話自己鍾意打機,睇動漫,電影, 而呢幾樣嘢真係會令佢覺得開心,學到嘢。
但係佢擔心如果女仔知道佢鍾意呢類型嘅題材, 啲女仔就會標籤佢做一個『毒撚』。
第二點就係, 雖然睇動漫係佢嘅passion, 但係佢又未去到同人講野唔望人, 又或者真係買啲大波女人做wallpaper或者買figure嗰一個層次, 只不過係一開始認識果陣唔會太熱情。
咁最後佢所講嘅就係 (等我copy and paste畀你啦):
“其實而家我溝緊一個女仔，佢本身都會睇動漫，不過係少，亦唔介意我打機，可能因為我唔會掛住打機唔理佢。
我地都叫做有共同話題，有時會講下電影、動漫，但係佢其實都會睇下NBA咁，而本身我又冇乜睇過NBA,雖然佢都唔討厭我，同佢都單獨出過一次街，亦feel到佢對我有好感，但係我覺得長遠係咁好似唔係辦法，我應唔應該改變下自己嘅興趣呢?”
好, 咁我哋就嚟料啦, 以下我有三點想同你分享:
#1 其實鍾意睇動漫電影係冇太大問題, 呢樣係你自己嘅興趣或者passion, 係可能某啲原因情況下好啟發到你嘅一種活動。
所以, 你唔好因為你嘅興趣而覺得慚愧, 覺得be ashamed of it;
相反, 你係應該Own It, 你係應該為屬於你自己嘅嘢感到自豪,你係應該有一種 “我係鍾意睇動漫啊,咁點呀?” 嘅心態。
因為當女士感覺到你唔能夠全面接受自己嘅時候, 佢亦都好難去全面接受你。
所以如果你真心鍾意睇動漫, 適量地去追隨你嘅興趣係絕對冇問題嘅。
#2 其實所謂『毒撚』之所以吸引唔到大部分女性, 其實都可以歸咎於幾樣行為特質, 例如:
- 佢哋唔太著重自己儀容, 唔去打扮一下, sex up 自己
- 佢哋缺乏良好嘅溝通技巧, 講嘢嘅時候得一個沉悶嘅聲調…
- 佢哋平時做嘅嘢太過單方面 (i.e.即係淨係睇動漫,打機)
- 佢哋冇乜野心為將來打算
(Btw, 如果你係一個有ambition嘅人, 即使呢一刻嘅你未必好成功好有錢, 但係女人見到你咁有上進心, 都會覺得你係一隻藍籌值得去投資一下。)
- 佢哋太過needy, 遇到心儀嘅女仔嘅時候, 好可能會即刻當佢女神咁樣拜,做一個所謂『守護佢嘅天使』
以上呢一啲都係比較unattractive嘅行為動態, 所以女性先會對毒撚冇乜興趣, 但係唔代表你鍾意睇日本某一類型嘅題材就代表你溝唔到女。
#3 你問我應唔應該改變你自己嘅興趣, 我有以下嘅睇法你可以去考慮一下:
我明白打機睇動漫電影會令到你開心, 會令到你有dopamine release/多巴胺荷爾蒙釋放嗰一種嘅開心愉快嘅感覺。
想自己開心係冇問題嘅, 所以間唔中沉醉於自己鍾意嘅娛樂都可以減下壓。
但係你要問自己比較deep嘅問題係:
”我嘅人生目的係咪為咗去享受,係咪純粹為咗快樂呢? 每一日去consume,每一日去娛樂, 係咪真係會令到我自己好fulfilling好滿足呢?
定係其實有一啲嘢我係suppose應該去做呢? 我係咪其實有一條屬於自己嘅道路等緊我去行呢?”
當你大概有一個答案嘅時候, 下一條你可以問自己嘅問題就係:
“假設我選擇去行屬於自己嘅一條路,假設我想去彰顯我嘅生命, 我每一日空餘嘅時間去打機睇動漫電影, 係咪一個長遠可以幫到我快啲達到我理想嘅活動呢? 呢類型嘅嗜好係咪一啲高投資回報率嘅活動呢? “
個重點係, 當你能夠知道自己人生想點樣行落去嘅時候, 當你有一個比較清晰嘅方向, 你就會知道呢一刻嘅習慣, 呢一刻嘅興趣嗜好係咪對你長遠有好處, 係咪會幫到你去你想去嘅地方。
記住, 無論你點樣揀, 都要記得呢個決定係你自己做嘅, 都要記得呢個係你自己嘅選擇 🙂