Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
端午節咁開心，想好快問你一個問題，你知唔知點樣做一個真正嘅型男呢？
好多人包括我自己，每逢聽到『型男』呢兩個字，
就會諗起例如碧咸，Brad Pitt畢彼特，George Clonney佐治古尼，Ryan Gosling，Robert Downey Jr.等等嘅明星。
所以好多男人見到呢啲『型男』咁受女人歡迎嘅時候，都會嘗試去模仿佢哋，嘗試去『just be cool』。
但係其實『just be cool』有少少誤導，咁樣做有幾樣問題出咗嚟。
＃1 就係男仔諗住扮型／act cool嘅時候，佢哋就會顯得太過try hard。
Try hard = Die Hard
因為每逢你嘗試扮型，你嘅行為表現就會變得好唔自然，並且你會同自己講你既底子一啲都唔吸引。
＃2 First Impression／第一印象雖然係好重要，
但係更重要嘅係：當人自己總結某一件事嘅時候，佢哋就會真係好難再改變自己嘅意見。
意思係，first impression只係畀人一種感覺，只係一種『你能唔能夠入到門口』同人哋相處嘅第一關。
但係人哋對你最終嘅conclusions，係取決於佢哋自己點樣同自己內心講嘢，點樣去總結你係一個點樣嘅人或者其他嘢。
譬如：你成日喺度諗點樣開場白開得最完美，
其實開場白對你同嗰女仔之後相處嘅關係幾乎冇乜影響，你只要開到口講啲random嘢就ok，唔需要畀咁大壓力自己諗住用一句精彩嘅opener去溝到佢。
相反，就算畀你咁好彩，第一句講嘢就令到個女仔笑，跟住對住你眼甘甘，
但係之後個interaction你表現到好needy，好在乎得唔得到佢，好心急係咁chur佢追佢，
咁樣你之前建立所有嘅吸引力行為都會馬上被殲滅！
所以記住：
first impression同conclusions之間係有一個短短嘅時間框架，
去讓你製造一系列有吸引力嘅行為特質，之後讓女仔自己總結你係一個值得交往嘅男人。
＃3 如果有人總結覺得你係一個好『造作』嘅人，其實佢嘅意思係你做人唔夠一致，唔夠congruent。
Congruence嘅意思係，
你每一句話語，你每一下嘅眼神交流，你每一句說話嘅聲調，
你每一種身體語言，你每一次嘅行為舉動係咪『身心一致』，表達緊你最真實嘅諗法情感呢？
你諗到想做嘅嘢或者你感覺應該做嘅嘢，你係咪真係會喺現實之中付諸行動去做呢？
所以如果你畀人嘅感覺係『言行不一致』，佢哋就會覺得你好假好fake。
可能你會問：『要點樣先至能夠身心一致地成為一個型男呢？』
以下我就畀三個小貼士你去慢慢成為一個真正嘅型男：
Tip＃1 對於你控制範圍之外嘅嘢，唔該你唔好再睇得咁重。
James Bond之所以係典型嘅『型男』，就係因為佢比一般人顯得唔太在乎，
即使佢好著緊／關心某啲嘢，或者遇上一啲好危急／好危險嘅情況，佢都係以一種『處之泰然』嘅心態去盡力處理一件事。
事實係：
我哋每個人都有care嘅東西，但係我哋要學識分辨邊一啲嘢係喺我哋控制範圍之內，邊一啲嘢係完全不能夠被操控。
所以如果今日咁好彩陽光普照，去Starbucks飲嘢無啦啦有個靚女主動同你搭訕，cool，好好享受呢樣嘢；
但係唔好將自己attach落呢種『理想化嘅情景』裡面，因為天氣好唔好／會唔會遇上一個可愛嘅靚女主動同你搭訕，呢啲『結果性嘅嘢』我哋係唔能夠控製到。
相反，如果有人無啦啦失驚無神講一啲好mean嘅說話俾你聽，
cool，要明白佢哋嘅行為完全唔關你事，佢鬧你只係顯示佢自己內心嘅不安同妒忌。
每逢有啲人想『踩低某個人』或者想令到某個人出醜，
佢哋咁樣做只係想透過外在因素話俾自己知『佢比另外嗰人高價值』，呢種係一種缺乏自信嘅表現，唔需要理呢啲低地位嘅人。
Tip＃2 唔好再有一種『佢係天才／佢條命生得好』嘅受害者心態
塑造自己成為一個型男係一種技能，係一種可以學嘅skills。
冇人天生就係型嘅，好多今時今日嘅型男都有柒過嘅階段，
每個型男都係隨著時間建立良好嘅行為習慣令到自己變得更型。
所以唔好再畀藉口自己『話以前冇人教你去型』，
你成為型男嘅第一步，就係你必須首先批准自己去以一個嶄新嘅型男形象，去面對世界。
Tip＃3 最型嘅人，永遠都係嗰個最能夠喺當下玩得最開心嘅人。
如果你有落過club，你都會見到九成嘅男仔都係喺度扮型，扮cool，扮有錢開枱，扮唔想溝女。
如果dancefloor少人嘅時候，好少男仔係會主動落去跳舞，又或者要等到成個場爆曬之後先至願意落去un一un。
正當大部份男仔都喺旁邊扮型，一路飲野一路四圍䀹女，唔同其他人傾計，
其實佢哋只係顯示自己淆底，一個唔social，一個根本唔鍾意clubbing嘅人。
所以你落club，千祈唔好做嗰個扮型嘅偽James Bond，
即使你唔識跳舞，你都應該享受當時嘅音樂，投入喺當時嘅氣氛，係嗰一晚四圍同唔同嘅人傾計，好好玩下。
咁樣先係一個具有社交能力，
一個帶俾其他人正面情感，
一個充滿正能量自然流露嘅雄性領袖型男！
希望今集幫到你！