Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
曾經喺日本有一個好得意嘅研究我今日想好快同你分享嘅：
個實驗嘅過程，就係研究人員首先蒙著學生雙眼，
跟住同佢哋講話佢哋嘅右手搽咗一啲有毒植物嘅液體；
咁過咗一段時間，全部嘅學生隻右手真係出現咗典型嘅敏感反應，
譬如痕癢／腫痛／發炎甩皮等等；
但係事實嘅係，其實研究人員只係搽咗一隻無害普通嘅植物喺佢哋嘅右手到。
更搞笑嘅係，
研究人員同時間喺佢哋左手搽咗真係有毒嘅植物液體，但係同佢哋講話係冇毒嘅；
結果13個學生只有兩個隻左手出現敏感嘅反應！
係咪好神奇呢？
點解搽一樣冇毒嘅嘢可以令到人出現『中毒』嘅反應？
但係搽一樣真係有毒嘅嘢反而冇事呢？
呢一種就係心理學家所講嘅Expectant Theory，
即係話你大腦所製造嘅預期，係可以同現實生活中所出現真正嘅嘢，有等同嘅真實感。
呢一種就係我哋嘅creation process， 我哋點樣將『未發生嘅嘢』轉化成為『真實發生嘅嘢』。
我哋生命絕大部分嘅嘢都係由自己直接或者間接創造，而你創造嘅嘢好多時都係由你預期／expect嘅嘢所形成。
Expectation係好多Creation嘅始祖，
如果你一開頭已經唔預期你會做到某啲嘢，好自自然然你都唔會take action去製造嗰一種結果出嚟。
例如：
如果你唔預期自己減到肥，你做運動嘅時候都冇咁落力，你亦都唔會節制你嘅飲食。
如果你唔預期自己嘅優點／價值值得畀面前呢個女仔認識，你亦都唔會行去同佢打招呼。
如果你唔預期自己勇敢創業係可以長遠地帶畀你真正嘅自由，你幾乎必定會繼續逗留喺一份你唔願意做嘅工作裏面。
咁所以今日嘅action step就係：
寫低你其中一樣嘅Positive Expectation，正面嘅預期。
跟住問下自己，我要進行乜嘢嘅『行動』，要經歷乜嘢嘅『過程』，可以增加呢樣結果出現嘅可能性呢？
寫低之後，你就一路付諸行動，一路觀察今日慢慢會出現嘅現象啦！