Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
嚟到超男之道系列嘅第15集，今集叫做 Don’t Get Lost in Tasks and Duties。
意思係 ：
無論你人生目的嘅細節係乜嘢，你都要小心沉迷／墮入喺某一種瑣碎嘅細節裏面；
因為講到尾，其實你人生最後都只係關於你每一個當下，每一個moment最深入最deep嘅真相。
所以男人係應該每隔一段時間，就要做一啲meditation／靈修去清晰自己，
每隔一段時間去一個短短嘅旅行，refresh自己嘅頭腦，令自己繼續睇到bigger picture，睇到大啲嘅畫面。
各位巴打，尤其係我哋呢啲有野心會take action去創造理想嘅男人，我哋好多時會發現自己唔小心墮進一個『doing mode』，
係咁不斷前進，好專注地去搞掂一個task再去搞掂另外一個task，唔想有其他人騷擾我哋。
我哋能夠focus自己去完成當下嘅工作係非常重要，但係男人呢一種嘅優點同一時間亦都係我哋嘅弱點。
能夠有discipline／紀律性去為自己嘅purpose打拼絕對係好嘅事，
但係正當我哋每日完成一啲小目標／一啲日常工作，
我哋亦都要小心自己成為一個眼光狹隘嘅人，小心自己成為一隻不斷喺倉鼠籠跑輪上面跑嘅倉鼠仔。
就好似呢一刻你可能好專注地聽緊MTFU，非常投入。
但係如果你呢一刻touchwood心臟病發死咗嘅話，你覺得你人生最後嘅一個moment會係有乜嘢感覺呢？
你係咪會感覺到宇宙存在嘅神秘，所以你人生最後一刻仍然充滿著驚嘆同感恩呢？
你嘅心係咪完全打開，所以你人生最後一刻係會被完美愛情之中融化呢？
定係你會太過投入工作，
而忽略咗原來死亡係每一刻都有機會發生喺自己身上， 所以你無啦啦瞬間死咗嘅時候，先至發覺原來你一無所有？
所以作者嘅重點就係：
你能唔能夠讓自己投降於『自由同愛』並且死亡
－因為你知道自己在生嘅時候，已經盡力去分享你嘅禮物同以你嘅真相去做人－
就係對你能否每一刻完整地充滿自己嘅測試。
The test of your fullness in every moment is your capacity to die in free and loving surrender。
你有冇盡力去愛呢？
定係你收埋自己嘅感受，所以你最後一刻有所遺憾呢？
你會否放鬆自己去為世界嘅神秘驚嘆呢？
定係因為你被你嘅工作完全吞併，所以忘記咗每一刻都係一種奇蹟？
工作雖然重要，但係冇任何一種責任，係比起你嘅愛，你嘅自由，你嘅完全意識／知覺更加重要。
『Doing／做嘢』係你身體嘅特性，
如果你想你嘅身體繼續運作，你就一定要繼續食嘢瞓覺呼吸，你就一定要工作，照顧屋企人，刷牙洗面等等。
但係『Doing』只係喺地球上一啲機械式嘅嘢，並唔能夠讓你意識到自己『Being』嘅絕對真相。
當你正確地完成你嘅工作，佢就能夠釋放你生命嘅能量，讓你終於可以留意並且處理真正重要嘅嘢：
就係去調查一下並且發現咩先至係真正嘅自由／true freedom。
你而家嘅工作係咪為你『鋪路』去尋找自己嘅真相呢？
如果唔係嘅話，你一定要儘快放棄佢並且尋找另一種『更加expand你』嘅工作。
正當好多女人浪費時間喺一啲情感上嘅激流波動，好多男人亦都浪費時間去『不斷完成工作』。
日以繼夜，夜以繼日地成為一個淨係識得做嘢嘅機械人。
有咩解決辦法，去處理呢種『需要生活但係又唔想忘卻真正人生意義』嘅兩難呢？
答案就係：
喺你處理日常鎖碎事件嘅同時，
你亦都要schedule／計劃一啲每隔一段時間騷擾自己嘅refreshers，plan好一啲能夠『迫自己停一段時間去仔細思考』嘅period。
喺呢啲『唞氣／放假嘅日子』，你一定要想像一下自己死亡嘅一刻。
再次提醒自己『最想成為一個點樣嘅人』，讓自己去探索一下宇宙嘅奧秘，放鬆自己喺一啲深刻偉大嘅愛之中。
咁樣你就會記得生命嘅無限，
咁樣你就會記得以一種宏觀嘅視野去睇你嘅當下，
咁樣你就會記得你唔係Star Wars裏面被洗腦嘅複製人，
繼續以一種勇敢嘅態度，去實踐你願景嘅每一日細節。
希望今集幫到你！