Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
今日想解答一條世紀大難題，就係點解『男人不壞，女人不愛』呢？
點解女人成日想話要一個『好男人』，但係佢哋出現嘅時候，佢哋又會覺得佢哋冇吸引力而揀番一個『壞男人』呢？
究竟bad boys有乜嘢特質令女人不可抗拒呢？
以下有幾個重點你可以參考一下：
＃1 『壞男人』係深不可測，永遠都估唔到佢下一步會做乜嘢。
但係你要注意，『壞男人』唔係因為為咗溝女而去扮曬神秘，
因為如果你咁樣做，你就係reaction-seeking，你就係嘗試得到女人某啲反應而去做一件事。
『壞男人』之所以咁unpredictable，係因為佢哋根本唔在乎個女仔，根本唔care個女仔，亦都係之前我所講嘅he doesn’t give a fvck！
就係因為呢個『壞男人』太過沉迷喺佢自己嗜好或者任務，
例如佢好鍾意玩電單車玩衝浪，或者玩一啲極端冒險嘅運動，或者日日好沉迷去夾band跳hiphop玩滑板，或者佢好反叛好熱血去反對一啲專制嘅政權等等嘅行為。
佢咁投入自己嘅『人生目的』，所以佢哋都唔得閒理個女仔，更加唔會為咗得到女仔某啲反應而去做某啲事情。
相反，九成嘅男人都嘗試去奉承成個女人，去將女人擺做佢嘅第一位，去please去impress個女人。
如果你都好似咁樣做，你就係一個女人可以預測得到嘅男人，佢知道你下一步會點樣做就等於你好悶，畀唔到驚喜佢。
所以女人之所以咁鐘意『壞男人』，其中一個原因係佢哋夠神秘，夠刺激，做嘢夠隨機。
就好似睇一齣有質素嘅美劇，每次諗住知道會發生啲咩嘅時候，總會有些意想不到嘅插曲出現，令到你好想追下一集睇下故事點樣發展。
＃2 『壞男人』有一種『毫不在乎』嘅感覺表現到出嚟，有一種『唔理後果係點樣』嘅特質。
意思係，佢唔會care個女仔點樣諗佢，佢更加唔會在乎人哋點樣睇佢；佢係一個好自由，好放任，好無束縛嘅男人。
所以對住女仔嘅時候，佢鍾意講乜就講啲乜，佢想揶揄佢就揶揄佢， 佢想串條女就串條女，
佢覺得有啲嘢唔啱嘅時候佢就會去反對嗰個意見，佢會challenge挑戰個女仔睇下佢有咩底細。
佢咁樣做完全係因為呢啲行為可以令自己自high一下，
亦都係正正因為佢唔在乎個女仔點樣諗佢，個女仔先感覺得到一種抗拒唔到嘅拉力埋佢身邊。
＃3 『壞男人』係任何情況下都係一個leader。
就好似Fifty Shades of Grey《格雷的五十道色戒》裏面嘅Christian Grey，
佢一開頭已經好直率地同Anna講話如果佢想同佢一齊，佢哋就會有乜嘢遊戲規則，仲要真係白紙黑字寫出嚟，簽埋合約之後先至玩SM。
個重點係，『壞男人』係知道自己想要乜嘢，跟住就會『坦蕩蕩』地去攞嗰樣嘢返嚟。
所以佢係會知道每一餐飯想食啲乜嘢，每一日想玩啲乜嘢，佢係好清晰自己宏觀地去緊邊一個方向。
＃4 『壞男人』係一個獨立嘅男人。
佢唔會依賴人，佢唔會覺得冇左邊個就唔掂，
所以即使佢未必好有錢，佢都會用盡一切辦法去做一啲真正令自己開心嘅事。
另外一樣嘢就係，即使佢同個女仔一齊咗之後，佢都唔會放棄自己既嗜好，更加唔會妥協自己嘅passion。
亦都係因為咁樣，女人會更加尊重佢嘅工作同娛樂，唔會踩過佢嘅界線，畀番啲私人空間佢。
#5『壞男人』係一個唔完美嘅男人，一個有瑕疵嘅男人。
你可能會心諗：『下！乜女人唔係想要一個完美嘅男人咩？』
答案係錯啦，
因為女人係鍾意去『改善／改變』個男人，所謂『希望令佢變得更好』，
而男人係鍾意去『拯救』個女人，希望從佢嘅痛苦之中救佢出嚟，令佢永遠開心幸福快樂。
咁所以當你嘗試去成為一個『完美嘅男人』嘅時候，對女仔嚟講你就已經冇曬challenge，佢已經冇咗一種挑戰去『將你變得更加好』。
所以就算喺埋一齊，你哋之間嘅relationship都已經冇咗一個目的，冇咗一個角色。
『壞男人』之所以咁吸引女人留喺佢哋身邊，係因為佢哋嘅缺點／瑕疵令到女人有原因去繼續嘗試改變你。
希望以上五點令你更加明白『男人不壞，女人不愛』嘅真正意思！