Yo! 我喺MTFU嘅Man神啊，歡迎嚟到新一集嘅ManTheFvckUp，
協助你成為一個更有力量，更有吸引力，更有影響力嘅現代雄性男人，創造你想要嘅夢想帝國。
＃1 今日非常之興奮，因為有為MTFU嘅巴打能夠講出我一直所講嘅重點，而呢位巴打喺絕對值得嘉許，
所有我今日同你分享嘅話題就係叫做『點解做人係應該以自我為中心？』。
好多人會覺得，做人必須selfless，我哋應該『幫得幾多就幫幾多』，
我哋應該做多啲善事，雪中送炭，盡能力幫有需要嘅人。
＃2 True，very fvcking true。
因為如果個個都係淨係為咗自己利益為依歸，做嘢純粹為咗一己之欲，個個都係各家自掃門前雪；
呢個世界就變得好冷漠好恐怖，人類只會不斷活係恐懼嘅邊緣，弱肉強食等待死亡。
冇錯，以上所講嘅做人道理好多人都能夠明白，唔少人都能夠以身作則，
以自己僅有嘅資源去幫助有需要嘅人，一切都非常有啟發性，值得學習。
＃3 但係，好多人就忽略咗：
如果你真心地想幫助最多嘅人，你喺必須首先『以自我為中心』，你喺必須首先『自私啲為自己諗』；
你喺必須首先擴大自己嘅知識技能／影響力／感染力，你喺必須首先take care自己，
你先至能夠做到一個擁有最大能力去幫人嘅好人！
＃4 正如巴打kwokjerome所講：『以自我為中心』就是將自己看作成太陽，能夠發光發亮引領身邊啲人跟隨你。
滿足自我是基本，在自我滿足的條件底下再為身邊的人作更大的貢獻，從而產出價值才是根本。
平時所講「自我中心」地活係自己嘅世界，就係自我滿足的需求過大，即係黑洞一個幫唔到人同時仲會為別人帶來麻煩。
＃5 畀個例子你：
冇錯，你開小店做優惠支持街坊係絕對值得讚賞嘅行為，絕對應該俾個like你。
但係如果你嘅小店搵唔到錢，根本就係蝕住做，你自己同屋企人一路捱窮，
最後令到小店結業，你原本嘅cause／你原本嘅好心，又能唔能夠繼續去幫人呢？
又或者點解你一早無take action去做大啲，去成為全球嘅『小店』，喺世界各地同樣地幫助最多嘅街坊呢？
＃6 又例如：
冇錯，你每星期好好人地買旗／去做義工係非常有意義，喺值得讚賞值得支持嘅事情。
但係點解你唔think bigger，點解唔將自己現時嘅影響力提升100倍，
令到自己將來係成為開辦慈善機構嘅創辦人，一次過幫助過百名過千名有需要嘅人呢？
＃7 搭飛機嘅時候，機長空姐都會叫你喺遇到緊急嘅情況嘅時候，
你係應該首先為自己帶上氧氣罩安全帶，之後先至幫助身邊嘅兒童。
點解呀？
點解要咁自私為自己著想先呀？
點解唔首先『為他人設想』先呀？
＃8 因為真相就喺：
如果你唔率先take care自己，你就唔能夠發揮自己100%嘅潛能同能力，去最大程度地幫助最多嘅人！
如果連你自己都財政困難嘅話，你又點幫助你愛嘅親朋戚友去解決佢哋嘅困難呢？
如果連你自己都周身病成日睇醫生，你又點幫助減輕成個醫療制度嘅負擔呢？
如果連你自己都唔係以最佳狀態去工作，你又點可以保證自己能夠產出最有質素嘅工作，點要求你老闆去加你人工升你職呢？
如果連你自己都唔清晰理解自己嘅性格，心理素質同自己每日起身生存嘅目的，你又點會知道咩類型嘅女朋友先至係合適自己，一齊成長一齊長遠發展呢？
＃9 重點就係：你同我都必須學識『自私啲』，必須學識『為自己諗先』，必須學識『以自我為中心』，
你先至能夠最大程度地提升自己價值同能力，之後再去為其他人提升佢哋嘅生活質素。
只要你『自私』背後嘅意向一直都係『希望透過首先提升自己，防止自己成為負累，從而協助其他更多有需要嘅人』，
咁樣你『自私地』為自己諗根本就喺一種崇高值得嘉許嘅思想！
＃10 要記住：
你必須首先燃亮自己嘅光輝，你先至能夠喺黑暗嘅大海之中，引導迷失嘅船隻。
你唔首先發光發亮，
你唔首先變得強大，
你唔首先投資喺自己身上，
你又邊有能力去感染其他人去為自己嘅人生發光發亮，令世界變得更加溫暖呢？
I love you, but I love myself too.
希望今集幫到你！