Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
喺我過去呢幾年協助唔同巴打創造自己理想戀愛生活嘅時候，
我發現原來有一個好大嘅『量度指標』，
可以預測得到呢位男士，能唔能夠好快應用佢學嘅dating skills，並且開始得到顯著嘅進步。
所以如果你都能夠習慣性地做到呢一樣嘢，咁你學嘅所有溝女技巧同埋mindsets都會好快融會貫通；
否則嘅話，你嘅溝女成績將會進步得好慢。
呢樣嘢係乜嘢？
答案好簡單：就係Be A Social Guy，做一個習慣交際嘅人。
如果你想盡快識得同女人相處，你就必須首先掌握同一般人傾計嘅技能，並且將呢件『同陌生人傾計』嘅事習以為常。
當你能夠開始進入一個social mood，一個社交嘅心情，一個開聲講嘢嘅狀態，
咁樣你行去approach女仔或者開聲同人講野就會容易好多，而你當時嘅energy亦都會喺有吸引力好多。
Social First，Sexual Second。
如果你畀人嘅感覺係扮型／扮勁／扮高竇，好多時你都顯得太過try-hard，太過想得到人哋注目認同。
所以正如我前幾集所講，千祈唔好try to be cool，做一個黑暗沉默寡言嘅偽James Bond；
你應該著重係做一個Social Guy。
問題係：你可以點樣訓練自己大腦變得更加social呢？
如果你係聽緊今集嘅話，好可能你嘅工作或者生活習慣，唔係一種好自然就會認識新朋友嘅環境裡面。
你亦都可能同我一樣，本身個人係偏向內向，
又或者通常做嘢都係自己一個，可能每日大部分嘅時間都係對住部電腦。
當你一日做完十個八個鐘嘢，離開辦公室之後，
你好大機會都唔係喺一個Social Mood／社交心態上面。
咁所以唯一一個方法將自己慢慢轉化成為一個比較social嘅人，
就係你之後必須見到人嘅時候，要開口講一啲無關痛癢嘅嘢。
譬如你入𨋢嘅時候，你同某個人有眼神接觸，你就可以輕輕簡單講一句Hello，跟著微笑點頭。
又或者你一朝早起身，見到你樓下嗰個看更管理員，你都可以就咁略略講聲『早晨呀叔！』，跟住先至出去返工。
又或者你買咖啡嘅時候，你略略問下嗰個barista今日有冇乜嘢special promotion，略略講一兩句之後先至order你杯嘢飲。
其中一條超聰明嘅小貼士，
就係嘗試搵一啲做客戶服務中心／Customer Service嘅職員傾計，因為佢哋嘅職責就係有禮貌地同你傾計 LOL
所以你絕對有權去善用佢哋嘅service，去鍛鍊你自己嘅social muscle，為接下來嘅interactions做好熱身。
另一個超好嘅技巧，就係同個的士／Uber司機大佬搭訕，
揸車嘅人都好撚鍾意同人傾計，你亦都可以從佢哋嘅口中學到好多嘢，
講下新聞，講下佢哋最近生意點，講下佢哋最近有冇遇上一啲麻煩客等等。
喺我哋亞洲國家，雖然同人搭訕唔算係一種普遍嘅行為現象，
但係你咁樣做一定會正面地令自己stand out『突圍而出』，
因為你係喺度add value，你係識放緊正能量，營造一種良好嘅氣氛，協助其他人脫離佢哋沉悶嘅生活。
你唔係喺度take value，
你唔係喺度從某人身上得到一啲嘢，
你唔係喺度叫人買旗／捐錢／簽合約／睇樓etc，
你只係關心身邊陌生人嘅一個友善嘅人。
所以由你踏出門口嗰一刻開始，到你夜晚返返屋企，
你要開始習慣同唔同嘅人就咁say hi，完全冇目的地打招呼。
你真係想溝女進步嘅話，我邀請你今個禮拜做一個任務：
就係嚟緊嘅七日，每一日都要同五個陌生人Say Hi，就係咁撚簡單！
你會好愕然，當你同人講『早晨／午安／或者就咁Hello』，
加埋你友善嘅眼神同微笑，絕大部份嘅人都會有禮貌地同番你打招呼，甚至願意同你傾計。
記得今個禮拜做呢樣功課，希望今集幫到你！