Yo！我喺MTFU嘅Man神啊。
喺過去幾年嘅時間，我發現每逢我講及『吸引力行為』嘅時候，總係會有一部分嘅private coaching學生嘅成績突飛猛進，好快一兩堂就溝到自己想要嘅女人；
但係有一部分嘅學生就總係進度比較慢，佢哋總係無信心馬上take action行動。
我今日以下所分享嘅嘢，就係我發現進度比較慢嘅學生，佢哋喺缺乏咗某啲溝女基本功元素；所以我一陣分享嘅時候，請各位巴打誠實地睇下自己有冇以下嘅素質。
＃1 想長遠溝到女嘅第一樣嘢，就係你必須相信其他人係值得你去認識。
如果你係想改善自己嘅朋友圈，同任何人建立關係，又或者學識吸引並且維持同某啲女人嘅關係，你係一定要深信they are worth it。
如果你嘅內心係覺得『世界上個個都係自私㗎啦。』／『所有女人都淨係想要一啲高大威猛靚仔有錢嘅男人啦。』／『所有人都會利用我傷害我 。』等等嘅信念，你永遠都好難同其他男人或者女人建立關係。
你要記住：好多時你點樣睇世界，你點樣預期人哋會對待你，人哋好多時都會用返嗰一種嘅方式去對待你，呢個就係『自我應驗預言』嘅威力。
所以，只有當你相信其他人會係對友善，其他人都係一啲和藹可親會give value嘅人，你先至可以睇到世界光明嘅一面。
咁當然去到某啲位你係需要客觀啲分析成件事啦，但係如果你下下都唔相信『其他人係值得你去認識』，你係基本上冇可能溝到女或者識到其他志同道合嘅人。
＃2 想長遠溝到女嘅第二樣嘢，就係你嘅內心係必須擁有『愛惜女人』嘅心態，而唔係『痛恨女人』嘅心態。
過去幾年大約有九成九成半搵我幫手嘅巴打，佢哋都係一啲想正確地『愛惜女人』嘅男人；
佢哋都想學習點樣可以長遠地吸引更多較高質素嘅女人，希望可以比起以前有更健康更成功嘅戀愛關係。
呢一批嘅男人都係一啲『愛錫女人』嘅lovers，所以佢哋嘅出發點都係想改善自己成為一個更有吸引力嘅男人。
但係有一小撮幾個%嘅男人，好可能係曾經『被分手』好幾次，又或者因為某啲謬誤覺得所有女人都係會呃自己，所以最後變成一啲終極haters。
前者所講嘅lovers，佢哋係相信每個人都總有自己獨特嘅價值，所以佢哋係一種正直嘅心態去認識新朋友或者溝女。
但係後者所講嘅haters，雖然佢哋亦都好可能會用盡一切辦法去得到某啲女人；
但係佢哋背後溝女嘅motivation，係因為過去自己被女人hurt，而演變成今日需要去『證明自己比女人優越』嘅haters。
雖然做一啲真心仆街嘅haters都可以溝到女嘅，但係你內心充斥住咁多負能量最終都只會令你吸引其他『過往不斷被男人hurt嘅女人，又或者一啲有心理病想向男人報復嘅haters女人』。
冤冤相報何時了，我就會用盡一切方法唔去吸引呢一批嘅女人喇，你呢？
＃3 最後第三樣長遠溝到女嘅重點，亦都係點解MTFU係獨一無二嘅原因，就係究竟你係純粹學習溝女skills啊？定係由頭到尾develop緊你嘅為人呢？
亦都即係話，你係咪學習緊吸引力等等嘅技巧去吸引一段關係？定係你係集中去由內而外去改善自己呢？
真正高質素有社交智慧嘅女人，係可以瞬間分辨出一啲『學習變得有吸引力』嘅男人，同埋一啲『事實係有吸引力』嘅男人。
咁我係咪叫你唔好去學習同女人相處呢？ Fvck no！
如果你有睇開我嘅片同newsletter，你都知道我係極力主張你去學習點樣增加自己嘅吸引力，去吸引更多異性。
但係你要記住：如果你嘅意圖只係希望令到自己『睇落』好似勁過你真人，『睇落』好似高價值過你真人，（btw，which is大部分PUA教你嘅tricks），
你唔係實質地 BEING better，實質地做一個更有價值更有吸引力嘅人嘅話，
你將來嘅溝女路途上係會絕對好快就會遇上樽頸位，你都係點解你係必須集中喺真實嘅個人成長之中。
＃4 呢個亦都係MTFU嘅長遠任務，希望可以啟發你喺你實質嘅為人／character上面有實質嘅成長。
如果你只係想要一啲quick fix，淨係想要一啲權宜之計暫時綁住你流曬血嘅傷口，我諗你可以從好多其他地方都搵得到。
但係如果你想成長成為一個男人，吸引一啲會愛錫你真人嘅高質素女人，
能夠無畏無懼地表達你多種嘅情感，成為一個會受其他人尊重並且仰慕嘅人……
咁我相信你就嚟啱咗地方。:-)
以上就係你想長遠溝到女需要明白嘅嘢，
which is ＃1 相信其他人係值得你認識；
＃2 做一個愛錫好女人嘅男人，而唔係因為以往嘅傷害令自己成為終極haters嘅男人
＃3 除咗學習短暫嘅溝女skills之外，更加需要集中長遠成為一個實質有吸引力嘅人，
鍾意今集嘅話就like，留言俾我知並且share比你值得分享嘅朋友睇啦， 下集再見你！