Yo! 我喺MTFU嘅Man神啊，歡迎嚟到新一集嘅ManTheFvckUp，
協助你成為一個更有力量，更有吸引力，更有影響力嘅現代雄性男人，創造你想要嘅夢想帝國。
＃1 各位巴打應該記得，
我曾經三番四次講過話點解你嘅neediness／依賴性，係一種將冇吸引力嘅性格特質，係會令到原本鍾意你嘅女仔都失去興趣。
今日就等我解釋一下，其實所謂嘅neediness／依附性／insecurity／缺乏信心究竟係點樣嘅一回事。
＃2 所謂嘅 insecurity，
就係每當你嘗試喺自己嘅個體以外，尋找一啲外在嘅東西令自己感到安心／安全／穩定／有把握；
而正正因為你係尋找一啲外在嘅嘢去令到自己感覺secure，呢啲外來外在嘅嘢，其實就唔係自己能夠100%控制得到。
＃3 譬如話，
如果我將自己嘅安心／快樂／幸福／自我認同感，放喺得唔得到外在嘅validation，得唔得到外在人哋嘅讚賞認可，得唔得到女人嘅賞識…
又或者我將自己嘅心情依附喺『今日天氣係咪陽光普照』嘅外在條件上面，你自己嘅安心／快樂／幸福／自我認同感就會永遠取決於喺別人身上。
正正因為你自己嘅價值／你對自己嘅信心，喺依附喺外在嘅條件上面（譬如有幾多架車，買到幾多層樓，自己係做咩工作，每日有幾多個女人like你IG post），
你永遠都會係缺乏信心，你永遠都會係insecure。
＃4 點解呢？
原因就係自身以外嘅嘢，永遠係outside your control，力量永遠唔係自己手上之中。
更加諷刺嘅係，每次你咁快就鍾意一個女人，你潛意識地就會想喺佢身上得到一啲認同／讚賞；
而每當女人感覺到呢種無形壓力，佢就會覺得有啲唔對路，佢就會pull away唔想理你。
＃5 所以無論係我前幾集所講嘅『 如何令自己更加強大』／『 溝女其實係色誘自己』／『 你真係想要一夜情？』，
重點都係點解你絕對唔應該好似PUA咁，嘗試從女人尋找自己嘅價值！
＃6 咁樣要令到自己對自己有信心做人，有咩解決方法呢？
PUA就會同你講，快啲diu十條女，搵多幾個性伴侶，你就會對自己有信心…
That’s fking bullsh!t!
雖然你短暫時間內可能止到血，但係以上只係一種建立自信治標唔治本嘅有毒方法。
真正令自己有信心嘅解決方法，就係『自己價值自己攞』，學識點樣 put your OWN sense of worth into your OWN hands.
＃7 意思就係，
透過自己嘅價值觀，建立自己一套嘅信念，透過你嘅人生目的，學識點樣自主地活你想要嘅生命。
呢幾年咁興喺度講autonomy，講嘅就係自己有自治權，講嘅就係點樣自己管理自己嘅生活。
你並唔係根據父母老師想你做咩而去活，
你並唔係根據其他女人想你做咩而去活，
你更加唔係根據『你認為女人想你成為咩』而去活。
你只係依據自己價值觀，自己需要咩想要咩，對自己長遠健康快樂嘅嘢，有意識地有目的性地去做每一件事。
＃8 而最容易開始感覺自己價值，最容易開始『有安全感』哋去做人，
就係知道自己喺世上活著嘅目的，你嘅life purpose，同埋你有咩vision／遠景去一步一步達到自己想見到嘅理想。
最簡單一條問自己嘅問題就係：
究竟我臨死之前，我應該要做啲乜嘢，我先至感到自己嘅生命完整呢？
喺我嘅喪禮上面，我究竟想出席嘅人點樣去形容我嘅人生呢？
＃9 講到尾，你想有一個長遠健康嘅social／dating／sex life，你必須首先建立一種同自己心理健康嘅關係。
如果你連自己都唔愛，連點樣同自己健康相處都唔識嘅話，你建立其他relationships只會害到人。
＃10 我明白你同我都有『生活需要做』嘅工作， 我明白你同我都有『唔想做但係必需要做』嘅嘢，
但係千祈唔好因為咁樣而忘記咗『自己真正想做嘅嘢』／『自己真正想探索嘅世界』。
如果你想學法文，主動啲schedule幾時學法文。
如果你想攀登喜馬拉雅山，主動啲schedule幾時開始行山，建立自己嘅體魄。
如果你唔小心被迫做咗ibanker但係其實自己passion喺煮嘢食，主動啲schedule幾時開始每星期花幾個鐘學習廚藝。
＃11 我哋同Elon Musk／Jeff Bezos／Mark Zuckerberg每星期都係只有168小時，
所以你並唔係缺乏時間，你只係缺乏priorities／優先處理嘅事項。
無論你幾忙，你每星期總能夠搵到幾個鐘做自己想做嘅事情。
只要你願意take FOCUSED actions，
你就絕對能夠再次熱愛自己嘅生命，
再次充滿正能量地衝刺，
再次喺女人以外之中搵到自己價值。
希望今集幫到你！